Penumbuh PTRDS dikearap ulih nanggam kaul kaban gerempung sereta ngemujurka program - Berita Iban Online

Header Ads

  • Baru Nyadi

    Penumbuh PTRDS dikearap ulih nanggam kaul kaban gerempung sereta ngemujurka program

    NGARAPKA MUJUR: Ngumbang (Duduk, empat kanan) enggau raban bukai maya baum empai lama tu tadi.
    SELANGAU: Gerempung Tuai Rumah Pelilih Selangau (PTRDS) udah ditumbuhka kena 24 September tu tadi lalu direjister ba Opis Pelilih Selangau.

    PTRDS tu dikeringka bala tuai rumah enggau ketuai genturung pendiau ari Ulu Mukah, Ulu Selangau enggau Ulu Dijih ti mungkur 58 buah rumah panjai enggau lima buah genturung pendiau.

    Ba gerempung tu, Ngumbang Awit nyadi chairman.

    Ke diatu sida udah bisi 50 iku raban.

    Tuju penumbuh PTRDS iya nya dikena nyimpan rikod Tuai Rumah kelimpah ngemujurka program ninting taun sereta nanggam kaul bala kaban gerempung.

    Nambahka nya, tu mega dikena ngaga platform alai ngempung penemu enggau buah runding bekaul enggau pengawa nyadi tuai ngemansangka rumah panjai enggau genturung pendiau diri empu.

    PTRDS bela nyadika menalan alai mantaika penemu bekaul enggau kus ke deka diatur ngagai ejensi perintah sereta ngelanggur program bukai baka nemuai sambil belajar.

    Sebedau bepilih, semua raban besetuju milih Pemesai Opis Pelilih Selangau Henry Inting Nyami nyadi penyanding penemu.

    Komiti PTRDS ke bukai iya nya Seli Ansi nyadi sapit chairman, Rose Tandang (Sekretari), Chandu Kanang( sapit sekretari), Ambrose Ramping Ebang (tukang wang) enggau Bayang Intai (sapit tukang wang).

    Komiti ke bukai iya nya Banyan Mawan nyadi pemesai publisiti, Christopher Chat (pengawa pengintu pengelantang), Pengarah Rantai (main asal), Kassim Remang (pengelikun), Hellen Dauh Bau (raban indu), Angga Nali (protokol 1), Sabeli Sana (protokol 2), Selat Naga (juruaudit-1) enggau Ramping Mugang (juruaudit-2).

    Aum keterubah PTRDS udah diatur kena 24 September empai lama ba Balai Mensia Mayuh Kampung Danau, Selangau. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads