Peranak menua pesisir meseti besedia napi empas DE - Berita Iban Online

Header Ads

  • Baru Nyadi

    Peranak menua pesisir meseti besedia napi empas DE

    NYAIN SEMPEKAT: Abang Johari (tengah) enggau bini iya sereta Hii (enam kanan) ngemataka pengawa nyain enggau besilihka MoU antara Zabariah enggau Ting.
    MIRI: Peranak menua pesisir kelebih agi di kandang menua Ulu Baram patut sedia napi empas ekonomi digital (DE), pengudah jalai penyambung ti dianti, Jematan Marudi, ti meraka Batang Baram, berengkah digaga dalam taun baru.

    Kepala Menteri, Datuk Patinggi Abang Johari Tun Openg madah, pengudah jematan nya tembu ila, iya ukai semina meransang kaul terus ari Miri ngagai kandang menua ulu di Baram, tang mega matak bala pengusung terus napatka palan ti manah di Ulu Baram, kelebih agi dagang temuai belalauka main asal, bejalai matau menua sereta mega rampa menua asal.

    “Sehari tu enti kita deka ngelakuka dagang temuai, kita patut bejalaika iya ngena chara digital, sekalika ngena virtual reality (VR) tauka augmented reality (AR), ngambika Miri ti dikelaku di media rama dipeda baka Miri ke bendar lalu tu chara baru dikena kitai matak penatai pengusung kitu.

    “Ari pengawa bekenaka media rama enggau manah dikena mantai sereta mandang ngagai dunya. Engkah aja berapa rega produk dagang temuai kita,” ku iya.

    “Tu mega gaya baru ba pengidup kitai ti enda ulih diseliah. Sekalika kitai nerima tauka enda, kitai enda ulih ngenggaika iya, tang kitai patut ngatur iya ngambika meri pangka ti manah ngagai ekonomi kitai,” ku iya nambah baru.

    Nitih ku Abang Johari, tu bepanggai ba rayat ditu enggau peranak menua pesisir kelebih agi di Ulu Baram, nyadi kreatif agi dikena matak bala pengusung datai ngagai sida seraya nyual produk nengah makit ekonomi digital.

    Kelimpah ari nya ku iya, pengawa ngelancharka ekonomi digital mega deka ngemuntangka komuniti dagang enggau rayat di nengeri ngatur dagang sida enggau nyual produk nengah digital lalu bebayar ngena chara digital, meli sayur ari menua pesisir pen tau dijual nengah dunya digital, tambah mega pengudah infrastruktur majak dikemanah (baka penembu Jematan Baram ila).

    Iya mansutka jaku nya lebuh bejaku ba pengawa bejadi muka Karnival ‘Taste of Borneo’ ditu, malam kemari.

    Sama bisi datai bini iya, Datin Patinggi Dato’ Juma’ani Tun Tuanku Bujang; Konsulat Republik China di Kuching, Fu Jijun; Menteri Muda Dagang Temuai, Seni enggau Main Asal, Datuk Lee Kim Shin; chairman pengatur Harry Lee Tian Song enggau bala menteri kabinet nengeri sereta bala pengari rayat ke bukai.

    Ngelansa silik, Abang Johari madahka pemutus Bank Negara ti nikika penyampau bayar ba Sarawak Pay ari RM200 ngagai RM3,000 deka ngerichahka agi dagang enggau industri dagang temuai di nengeri tu, laban pengusung ari menua luar enggau peranak ditu tau bebayar manggai RM3,000.

    “Kerejasama antara Sarawak enggau Perintah Singapore mega deka meda Sarawak Pay deka bisi kaul ngagai Singapore Pay,” ku iya.  

    Ku iya, tu ukai semina meri pengelebih ngagai kededua piak tang mantu nambahka agi awak enggau pengulih dagang temuai, laban mantu ngemuntangka atur transaksyen dagang temuai.

    “Aku madahka pekara tu ngagai kita laban kita ke nyadi komuniti dagang ti deka nerima pangka ari program tu.

    Kami, perintah semina nyediaka perengka guna dikena ngemuntangka atur pengawa enggau transaksyen dagang, tepulai ngagai kita ngemujurka iya,” ku iya nambah.

    Ba lansa ke bukai, bisi 120 bangsal bejualka bemacham bansa pemakai asal enggau moden, ngambi bagi dalam karnival nya.

    Berebak enggau pengawa nya, Abang Johari enggau bini iya sereta Chairman Pemimpin Karnival Taste of Borneo, Datuk Hii King Chiong, bisi ngemataka pengawa nyain Sempekat Pemereti Ati (MoU) antara Palan Penerang Islam Sarawak ti diarika Ketuai Pemesai Eksekutif iya, Zabariah Matali enggau Serakup China Sarawak ti diarika Presiden iya, Ting Pang Soon.

    MoU nya dikena ngaul kerejasama ngenegapka agi penyerakup enggau pengelantang ngagai pupu bansa di nengeri tu, kelimpah pengawa begulai dudi hari bekaul enggau perambu ngaga sebuah da agi Kampung Budaya di Miri. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads