Peranak Rh Uma Penan Peruan beterima kasih ngagai WTK Agribusiness - Berita Iban Online

Header Ads

  • Baru Nyadi

    Peranak Rh Uma Penan Peruan beterima kasih ngagai WTK Agribusiness

    Logo Utusan Borneo
    MIRI: Pengudah bepuluh taun nengah jalai sungai enggau bedarat ngelawa pendam, peranak rumah panjai Uma Penan Peruan, Kampung Ugos di Jematan Suai semak ditu berasai lantang pengudah sebuah kompeni kebun sawit dandang besai iya nya WTK Agribusiness besetuju nyaup ngerandang jalai dikena ngemuntangka penanggul ti ditapi peranak ke diau di kandang menua nya.

    “Taja semina jalai tanah aja, kami berasai lantang enggau bantu sida lalu meri terima kasih ngagai kerejasama enggau bantu menijar ladang sereta bala staf ti meretika peminta kami.

    “Diatu enggau pemisi jalai nya, pejalai kami ngelawa pendam semina 15 minit aja dibanding enggau timpuh pejalai ti lama sebedau tu,” pia ku Ketuai Raban Bansa Uma Penan Peruan, Sidi Jirap madah ngagai Utusan Borneo ditu kemari.

    Beserimbai enggau bantu kompeni tu, peranak di kandang menua nya ulih ngemuntangka pejalai sida ti ngelamatu ngena timpuh ke panjai, lalu diatu ulih dipandakka.

    “Berindik ari nya, aku ngarika peranak rumah panjai 80 pintu bilik meri terima kasih ngagai kompeni WTK Agribusiness ti udah mayuh nyaup kami ngerandang jalai enggau nyungkur sereta ngerataka jalai ngelawa pendam nya,” ku iya seraya nambah, peranak tau ngena entukar ngagai pendam nyema bisi pengawa nganjung antu, enda ibuh nengah jalai sungai sereta nadai irauka enda chukup perau dikena sida kin.

    Ngenang penusah ke ditapi sida suba, mayuh macham penanggul ti nyadi kelebih agi lebuh pengawa numbakka bangkai ke pendam.

    Tetiap kali pengawa numbakka bangkai dipejalai, peranak rumah panjai Uma Penan Peruan  nengah jalai sungai mai larung ke pendam sida.

    Nyema nengah jalai sungai timpuh diambi iya nya pengelama sejam setengah pejalai.

    “Udah bepuluh taun kami nengah jalai sungai ngagai pendam nya lalu diatu mar agi laban nyau badu agi nengah jalai sungai ngujungka pengawa ngena perau mega kurang lalu semina bepanggai ba beberapa buah perau lama dikena ke pendam,” ku iya nambah.

    Nyema nadai pengawa numbakka bangkai, pengawa bukai baka sembiangka pendam, peranak menua nya bedarat aja ngelawa pendam, urung sejam pejalai ari rumah panjai sida.

    Rambau pengawa sembiang pendam pun bulan tu tadi, peranak ke tebal agi megai pengarap Katolik diuluka siku paderi gerija Katolik di Batu Niah, bisi sembiang merekatka jalai baru nya.

    Pengawa nya udah digulu lebih 40 iku peranak genturung pendiau ke datai ngena entukar sereta bedarat.

    Berindik ari nya ku Sidi, peranak di menua nya mega minta pengari rayat sida, Menteri Bekal Ai enggau Elekterik Menua Pesisir, Dato’ Sri Stephen Rundi Utom, ngambi ngemanahka gaya jalai tanah enggau nganchau batu di sepemanjai jalai nya.

    “Kitai ngarapka pengari rayat kitai, Dato’ Sri Stephen Rundi (ADUN Kemena) ngambi mantu enggau pemeri batu, ngemanahka gaya jalai ngambika enda lichau maya ditengah entukar enggau peranak ke bedarat,” ku iya nambah.

    Rumah panjai 80 pintu diempu bansa Penan di Uma Penan Peruan nyadi raban bansa Penan asal ti diau di menua Suai. Pengudah pambar laban nitihka pengarap ti bebida, raban Penan ti megai pengarap Kristian enggau katolik nyengkaul bala nembiak redak Sidi Jirap ngentak rumah panjai di Kampung Ugos, Jematan Suai.

    “Seraya bala bukai ti megai pengarap Islam ngaga genturung Penan Islam, enda jauh ari menua tu mega,” ku iya nerang seraya nambah, pendam sida antara pendam pemadu tuai lalu udah bisi dia, dulu agi sebedau sida megai pengarap Katolik.

    “Nya kebuah kitai deka ulih meda penam tu bisi pendam lama enggau ciri-ciri tradisional bansa Penan seraya pendam baru, bisi lambang regang (sida ti udah megai pengarap Katolik),” tandu iya. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads