Perintah deka majak chakah ngatur program integriti, ku Talib - Berita Iban Online

Header Ads

  • Baru Nyadi

    Perintah deka majak chakah ngatur program integriti, ku Talib

    Program tu dikena nentuka integriti ulih dikemeran ba pengidup ninting hari setipak enggau aspirasyen nengeri, Malaysia.

    SEDIA: (Kiba)Talib datai tumu sereta sedia nyimpul jurai Opis Kepala Menteri (Integriti & Ombudsman) ba aum DUN hari keenam, kemari.
    KUCHING: Perintah deka terus chakah ngatur sekeda program integriti di nengeri tu semanjai taun 2018 dikena ngenukuka integriti ulih dikemeranka dalam pengidup ninting hari, pia ku Menteri ba Opis Kepala Menteri (Integriti enggau Ombudsman), Datuk Talib Zulpilip.

    Nitih ku iya, entara program ke diperambu terus dipejalaika iya nya ‘Roadshow Integriti’, Amanat Integriti, Ngenegapka Ombudsman enggau Penanda tikas (Benchmarking).

    “Program Roadshow Integriti deka dipejalai begulai enggau Komiti Penagang Makai Suap (SPRM), Institut Integriti Malaysia (INTEGRITI) enggau ejensi bukai ke ditentuka ila.

    “Roadshow tu diatur ba pasar mit di Sarawak ke lalu dikena kitai ngenyemakka enggau mensia mayuh setipak enggau aspirasyen nengeri enggau Malaysia.

    “Lalu Pesan Integriti deka dibai sereta dipejalaika ba renggat baruh ti mungkur bala ketuai raban bansa, ketuai etnik sereta Komiti Pemansang enggau Pengelikun Genturung Pendiau (JKKK) ba semua bagi menua di nengeri Sarawak,” ku iya.

    Talib mansutka pekara nya lebuh ke nyimpul jurai Opis Kepala Menteri (Integriti enggau Ombudsman) ba hari ke-6 Aum Kedua Penggal Kedua Kunsil Nengeri Sarawak Ke-18 ditu, ba Kompleks DUN, kemari.

    Berebak enggau tu iya madahka sebana mensia mayuh mega deka ditegapka agi kelebih agi bekaul enggau pengawa salah enggau isu integriti.

    Ku iya, chara bejalaika nya deka dipansik sereta dialuska agi dikena nentuka  pengamat pekara nya.

    “Seiti ari chara ke ulih diguna rayat ngenataika sebana, pengaga ati, tanya, peminta servis enggau meri penemu nengah TALIKHIDMAT.

    “Naka november 2017,  bisi 26,746 timbal bisi diterima. Ari penyampau nya, bisi 90.23 peratus timbal udah mujur diputarka ti mungkur 24,134 timbal,” ku iya.

    Nambahka nya  ku iya, perintah nengeri seruran meri komitmen tinggi ba pengawa ngenegap sereta ngemanahka atur pejalai ombudsman lalu seiti ari chara iya nya ngaga penanda tikas kemeran ke pemadu manah di   dalam enggau luar menua.

    Tuju penanda tikas nya dikena kitai ngiga chara ti pemadu engkeman ke ulih diteladan ba renggat nengeri Sarawak, ku iya.

    Kelimpah ari nya lebuh ke ngenang pasal integriti, iya madahka program nya dipunka ex-Kepala Menteri YAB Pehin Sri Adenan Satem ke deka meda Sarawak nyeliahka diri ari penyalah makai suap sereta nyadika integriti pekara ti dipejalaika dalam pengidup besesehari.

    Ku iya, Tok Nan ketuai perintah nengeri ti keterubah  nyain ‘Ikrar Integriti Korporat’ kena 15 Januari 2015 begulai enggau raban kabinet nengeri.

    Seminar Integriti Raban Penerit Adat Opis Perintah Negeri Sarawak ti nyengkaum Opis Kampung, Opis Tanah enggau Survei, NREB, Kunsil Sungai, PDRM, SPRM, Opis Kastam, Opis Imigresyen enggau ejensi penerit adat ke bukai ti bisi diatur di Kuching, Sibu enggau Miri berengkah September 2014.

    ‘Aku Janji Ikrar Integriti’ ti mungkur pengereja pengawa opis perintah nengeri enggau besai mega udah diatur dalam bulan November 2014 nyerumba Hari Pengereja Pengawa Perintah, ku iya,

    “Semua program nya mega ditampung kepala menteri ke diatu (Datuk Patinggi Abang Johari Tun Openg).

    “Entara inisitif integriti ke udah dipejalaika baka ‘Ikrar Bebas Rasuah’ Kabinet ti diketuaika YAB Kepala Menteri ke diatu kena 25 Januari pengudah dipilih nyadi kepala menteri Sarawak ke-6.

    “Ikrar Bebas Rasuah Pengereja Opis Perintah udah disain 1,690 iku pengereja pengawa opis perintah kena 14 Mac 2017,” ku iya.

    Nambahka nya entara program integriti bukai ke diatur semanjai taun 2017 iya nya program One Day Conference-Dovernance Culture, What’s Possible; Roadshow Integriti; pengawa pemandang enggau licha integriti nyerumba Kembara Jelajah Anti-Rasuah (KEJAR); Program Individu dan Organisasyen Berintegriti (PIOB); Certified Integrity Officer (CeIO), licha integriti enggau Pesan Integriti 2017 begulai enggau YAB Kepala Menteri Sarawak. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads