Perintah nengeri ngemeratka pengawa ngintu kampung - Berita Iban Online

Header Ads

  • Baru Nyadi

    Perintah nengeri ngemeratka pengawa ngintu kampung

    BEKUNSI PENEMU: Nanta maya berandau enggau sekeda ari penyereta sepengudah bejadi NRTrop5 di Sibu ditu, kemari.
    Gempuru antarabansa bekaul enggau kampung nyadi pelasar ti engkeman nentuka kampung seruran dijaga.

    SIBU: Pengawa ngatur Gempuru Antarabansa bekaul enggau kampung nyadi pelasar ke engkeman alai berandau sentang asil pansik sains bekaul kampung di nengeri tu.

    Sapit Menteri Pemansang Menua Pesisir enggau Kandang Menua (KKLW) Datuk Alexander Nanta Linggi madah, Sarawak sebengkah ari nengeri ti benung mansang baikka ba industri tauka penumbuh mengeri besai.

    “Nya alai, kitai randaka pekara bekaul enggau pengawa ngintu kampung ke diatu bela bisi berubah ba pemansang, numbuhka palan alai diau enggau palan endur ngiga belanja,” pia ku iya madah.

    Iya mantaika jaku tu maya bejadi Gempuru Antarabansa Kelima bekaul enggau Pengeraja Asal di Tropika (NRTrop 5) 2017 ba sebuah hotel ditu, kemari.

    Sama bela datai maya tu iya nya Mandal Chancellor Profesor Datuk Dr Mohamad Kadim Saudi.

    Nanta ti mega Kaban Parlimen (MP) Kapit madah, asil ari pengawa begempuru nya tau bendar nambahka pemanah asil pansik ari institusyen enggau ejensi pemansang kampung di menua tu kelimpah ba menua bukai.

    Ku iya, gempuru tu mega dikeandal ulih nyaup ngetanka pengeraja asal di kampung enggau industri ke bekaul.

    Ba gempuru tu, 77 bengkah keretas kereja ti deka dibantai bala penyereta menua tu enggau menua luar ti mega digulu lebih 100 iku sida ke bepengelandik ba pengeraja asal kampung ari 11 bengkah menua.

    Sida tu datai ari Amerika Syarikat, United Kingdom, Australia, Republik Czech, Filipina, Bangladesh, Singapura, Thailand, China, Jepun enggau Malaysia bekunsika asil pansik sida.

    NRTrop 5 ke diatur UNIMAS berengkah 27 November nyentuk 1 Disember tu bela dipenyadi beserimbai enggau penumbuh institusyen nya ke 25 taun. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads