Perintah nengeri Sarawak merambu deka numbuhka DFTZ - Berita Iban Online

Header Ads

  • Baru Nyadi

    Perintah nengeri Sarawak merambu deka numbuhka DFTZ

    Datuk Amar Awang Tengah Ali Hassan
    KUCHING: Perintah Nengeri merambu numbuhka Digital Free Trade Zone (DFTZ) ditu ngambi ulih nyaup ngerembai atur Dagang Mit enggau Jelan Pemesai (SME).

    Sapit Kepala Menteri Datuk Amar Awang Tengah Ali Hassan madah, DFTZ di Sarawak nya deka nundaka DFTZ ti udah ditumbuhka di Kuala Lumpur.

    “Menteri Besai bedau lama tu tadi bisi nusui ngagai aku DFTZ naka ke diatu udah nyaup ngelaku produk lebih ari 200 bengkah SME di Malaysia.

    “Nengah peluang nya, produk kitai ulih dikelaku ngagai menua luar baka ke China.

    “Di Kuala Lumpur, DFTZ dipenyadi Menteri Besai enggau Jack Ma ke alai perintah nengeri mega merambu numbuhka DFTZ renggat nengeri,”ku iya.

    Awang Tengah mansutka jaku nya rambau nguluka Aum Komiti Pemansang Pengawa Dagang Nengeri Sarawak (SEDCC) ke diatur di sebuah hotel ditu, kemari.

    Dikena ngepunka juluk nya ku iya nambah, Pos Laju Malaysia bisi merambu kitai ngambi bagi ba e-dagang nyemaka Lazada.

    Awang Tengah ke mega Menteri Industri enggau Pemansang Pengawa Dagang madah, perintah udah meri pemendar ngagai Pos Laju Malaysia ngadu operasyen ba sebuah kandang endur di Sarawak.

    “Enti mujur, pekara tu deka mai empas besai ba pengerembai SME di Sarawak,”ku iya.

    Iya nambah, perintah mega deka numbuhka palan operasyen di Pavillion Kuala Lumpur ba ujung taun tu.

    Palan nya ku iya, deka meri peluang ngagai orang dagang SME ngelaku produk sida di Semenanjung Malaysia.

    “Kitai mega ngarap palan nya deka nyadi pintu endur ngelaku produk ngagai makit antarabansa,”ku iya nambah.

    Bela datai ngulu aum Menteri Muda Pemansang Dagang Mit enggau Jelan Pemesai (SME) Datuk Mohd Naroden Majais enggau orang bukai. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads