Perintah ransing ngemansangka kandang menua pesisir - Berita Iban Online

Header Ads

  • Baru Nyadi

    Perintah ransing ngemansangka kandang menua pesisir

    Datuk Masir Kujat
     Komuniti meseti ngemansangka diri dalam ICT dikena besemekih napi ubah pemansang dunya teknologi, ku Masir.

    SRI AMAN: Sapit Menteri Dalam Menua, Datuk Masir Kujat madah seriris enggau pemansang kemaya hari, perintah seruran bebendar mai pemansang enggau pengelantang ngagai semua serak komuniti di nengeri tu, kelebih agi peranak menua pesisir.

    Nitih ku iya, pengawa nya ulih dipeda nengah bemacham program pemansang ti udah, benung enggau deka chakah dipejalai perintah nengeri pulaika pemaik enggau penyenang rayat.

    Iya ke mega Kaban Parlimen (MP) Sri Aman mansutka jaku nya lebuhka bejaku bejadika MARKAS Pertiga Pelilih Sri Aman bepalan di Kampung Entulang Entawa, Sri Aman semak ditu.

    Taja pia ku iya, pengawa pemansang perintah deka mar dijapai nyema rayat enda ngena memanah semua awak peluang enggau perengka guna pemansang ti udah disediaka perintah. Pekara tu tentu deka ngerugika kitai semua lalu tau ngasuh pejalai projek pemansang di nengeri tu tejanggal.

    Berindik ari nya ku iya, kitai enda ulih semina diau diri sereta ngarapka semua bantu enggau subsidi ari perintah aja. Tang kitai patut ulih gawa ngatika diri, bisi inisiatif sereta ngerebut semua peluang ti disedia ungkup kitai kelebih agi dalam sektor industri, dagang, teknologi pemadah enggau arus penyambung (ICT), kebun dandang besai, pelajar, dagang temuai, servis enggau ke bukai.

    Ba pekara tu, kitai patut ulih mereti enggau nerima ubah sereta penemu ke baru enggau ngubah chara kitai berunding enggau bekereja ngambika kitai enda tinggal ari arus pemansang. Tambah mega kitai patut nyikap diri enggau penemu pengelandik ti chukup berengkah ari diatu dikena nyapai juluk menua kitai nyadi menua mansang datai ba taun 2020.

    Nangkan nya ku Masir, napi jeman dunya kemaya hari, empas ICT, pengawa ngangkatka ‘Komunikasyen Pemansang’ majak beguna enggau bisi peminta nempa komuniti bepenemu sereta berinformasyen tauka K-Society.

    “Nya kebuah, kuasa runding komuniti enggau penau ngaga inovasyen patut diberi pemerat ngambika sida ulih besemekih enggau napi pemar sosio-ekonomi kemaya hari. Enggau chara tu, kitai deka ulih meri penyedar ngubah ulah enggau runding, meransang komuniti rinduka penemu sereta nerima enggau ngujika penemu ke baru nambahka kualiti enggau tikas idup sida.

    “Pengawa naburka penerang pasal pemansang tu seruran nyadi agenda besai perintah ti dikenatai nengah opis enggau ejensi pemansang. Taja pia, penegap enggau pangka pengawa tu deka meruan agi nyema digaga begulai sereta ngaul bemacham raban baka bala ketuai raban bansa, raban peribit, media enggau gempung volunteer sereta Gerempung Ukai Dikuasa Perintah (NGO),” ku iya nerang silik.

    Berebak enggau nya ku iya, Komiti Pemansang enggau Pengelikun Genturung Pendiau (JKKK) nyadi sebuah gempung megai tanggungpengawa bejalaika pemansang ti diperambu perintah di renggat keterubah. Pemujur pejalai pengawa begunaka sukung enggau kerejasama di renggat komuniti.

    “Enggau nya, JKKK patut ari chara teori enggau praktikal bejalaika komunikasyen pemansang ti meruan di renggat pun menua. Pekara tu beguna endar laban deka bulih pemain iya nya raban orang diselinting dikena nentuka tuju enggau modus operandi,” tandu iya nyetemak.

    Sama bisi datai Chairman MARKAS Pertiga Pelilih Sri Aman, Hendric Junan sereta bala kaban MARKAS Pertiga Daerah Sri Aman ke bukai.

    Berebak enggau nya, Masir mega bisi nyuaka agih belanja ungkup taun 2018 penyampau RM10,000 ngagai serakup nya dikena bejalaika aktiviti semanjai taun sida. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads