Header Ads

  • Berita Tebaru

    Pesereta PSMSKS deka sangkai ba sekeda rumah panjai di Sarikei

    PENGAWA BADAS: Abang Mohd Porkan ngelepaska pejalai raban pesereta Program Ngetu Ngelala Volunteer Pengintu Pengelantang Pendiau Sarikei, kemari.
    SARIKEI: Urung 108 iku nyengkaum ari staf opis perintah enggau gerempung ukai perintah (NGO) bisi nyereta Program Ngetu Ngelala Volunteer Pengintu Pengelantang Pendiau Bagi Menua Sarikei (PSMSKS).

    Pemesai Opis Pengintu Pengelantang Pendiau Raban Bansa Bagi Menua Sarikei, Kee Lee Tang madah, program tu deka diatur pengelama tiga hari dua malam, lalu milih sekeda genturung pendiau enggau rumah panjai ba Sarikei nyadi palan penyangkai sida.

    “Ba genap palan sangkai, pesereta ke ngambi bagi ba program tu deka bejalaika sekeda pengawa baka beripai ti ngemeratka konsep volunteer.

    “Program tu ngemeratka ulah datai terus ti ngempuruka raban volunteer pengintu pengela tang pendiau begulai dalam mayuh ejensi enggau opis perintah meri servis lebih bekualiti ngagai mensia mayuh.

    “Berebak enggau nya mega, program tu deka nyadi pelasar endur nerenakka ulah kerejasama entara semua piak.

    “Konvoi tu deka bekejang ari Sarikei lalu deka ngetu sereta bemalam ba Rumah Meringai, Nanga Buku Pakan.

    “Udah nya hari siti, raban sida deka ngelawa Rumah Minggan di Nanga Sayong Julau sebedau neruska pejalai ngagai pelilih Meradong,” ku iya nengah penerang media, kemari.

    Entara tusun program tu ila baka aktiviti ‘Home Hep’, muka kaunter servis enggau eksibisyen ari ejensi perintah, licha, pekit enggau main, besenam sereta chabut tikit benasit.

    Urung 24 buah entukar dikena ngelawa palan ke udah dipilih.

    Nitihku Kee, batang tuju program tu dikena nerenakka ulah mentas ba raban volunteer ngagai raban orang tusah.

    “Program tu setipak enggau pengawa rama nyadi volunteer pengintu pengelantang pendiau lalu nyadi mata enggau pending perintah.

    “Aktiviti baka tu mega nyadi pekara baru ngagai kaban volunteer sereta ngasaika pengidup rayat ba menua pesisir,” ku tandu Kee.

    Pengawa ngelepaska raban peserta PSMSKS diatur ba laman Dewan Suarah Sarikei lalu dipenyadika Sapit Residen Sarikei, Abang Mohd Porkan. #UtusanBorneo

    No comments

    Post Top Ad