Pinta institusyen jalai pengarap dikemendar - Berita Iban Online

Header Ads

  • Baru Nyadi

    Pinta institusyen jalai pengarap dikemendar

    UNGKUP JALAI PENGARAP: Uggah (dua kiba) nyuaka chek ngagai ADUN Batu Kawa Datuk Dr. Sim Kui Huan di Komplek DUN kemari. Bela dipeda Dr. Ngenang (kiba).
    KUCHING: Bisi 77 pinta ari mayuh bengkah institusyen batang pengarap di serata Sarawak ungkup projek ngaga enggau ngangkatmanah rumah sembiang udah dikemendar ba taun 2017.

    Sapit Kepala Menteri Datuk Amar Douglas Uggah madah, belanja RM15 juta disedia ungkup tuju nya lalu dikemujur nengah ‘Unit For Other Religions”(UNIFOR).

    Ku iya, 65 pinta ari institusyen batang pengarap Kristian, 9 Buddha enggau 3 Sikh bulih pemaik ari agih belanja nya.

    “Kepala Menteri Datuk Patinggi Abang Johari Tun Openg udah ngemendar agih belanja RM15 juta ba taun tu dikena ngaga sereta ngangkatmanah rumah sembiang.

    “Tu mandangka perintah nengeri beratka pemaik peranak bemacham jalai pengarap di Sarawak,”ku iya bejaku ngagai pengarang berita.

    Chek agih belanja ke disua Uggah nya kemari diterima bala ADUN ba sebengkah pengerami di Komplek DUN ba Aum DUN kemari.

    Iya pechaya, agih belanja ke diberi deka ngenegap kaul manah rayat di nengeri tu ti diarika mayuh bengkah jalai pengarap.

    Uggah nambah perintah diatu bisi nerima 82 pinta baru ari institusyen batang pengarap.

    Pinta nya ku iya ke mega Menteri Betanam Betupi Moden enggau Pemansang Kandang Sarawak, deka diperunding ba taun 2018.

    Ngenang kaul bukai, Uggah madah perintah nengeri udah nyendiaka sebidang tanah pemesai tiga ekar ungkup tuju ngaga Komplek Opis UNIFOR.

    UNIFOR sebengkah ejensi ke ari baruh perabung Opis Kepala Menteri ti ditumbuhka kena 24 April 2017.

    Bela datai Direktor UNIFOR Datu Dr. Ngenang Jangu enggau raban menteri sereta ADUN. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads