Header Ads

  • Berita Tebaru

    Polis Marin dipinta nyaga pengelikun semua besai tekat ai di Sarawak

    Datuk Masir Kujat
    SIBU: Sapit Menteri Dalam Menua Datuk Masir Kujat ngansak ngambika polis marin dianjung gawa ba semua tekat ai besai di Sarawak dikena ngenegapka agi pengelikun aset besai perintah.

    Iya udah mantaika peminta tu enggau Kepala Polis Menua, Tan Sri Mohamad Fuzi Harun.

    “Dikearap Tan Sri IGP deka ngerah Komandan Polis Marin berengkah bejalaika pengawa ti manah tu,” ku Masir kemari.

    Apin lama ke udah, bisi diripot Polis Marin Menua bisi merambu deka ngadaka opis polis di tekat ai hidroeleketerik Bakun dikena ngenegapka raban penyaga pengelikun ke bisi dia.

    Komandan iya, ACP Salehuddin Mat Zaman madahka pekara tu dikena nentuka Bakun, nyadi aset besai menua, deka dijaga memanah, ke alai keretas kereja ungkup perambu nya udah dianjung ngagai Bukit Aman ngambika dikemendar.

    Salehuddin Mat Zaman nyemetak madah, naka ke diatu pengelikun ba tekat ai nya dijaga raban polis begulai enggau Sarawak Energy Berhad, tang bisi pematut raban polis bukai dianjung gawa mendam dia.

    Ba lansa ke bukai, Masir ke mega Kaban Parlimen (MP) Sri Aman muji semua Bajet 2018, nyengkaum belanja operasyen enggau pemansang.

    Lebuh mantaika Bajet 2018, Menteri Besai Datuk Seri Najib Razak udah ngagihka belanja penyampau RM9 bilion ngagai raban polis.

    Masir beratika belanja RM250 juta ungkup Eastern Sabah Security Command (ESSCom) dikena ngangkatka pengelikun dalam Sabah enggau Sarawak, nyengkaum RM50 juta ungkup radar kandang tebing tasik.

    Iya mega beratika RM50 juta deka dikena nambahka aset raban polis khas dikena ngelaban raban penyelawai.

    “Kelimpah ari nya, RM700 juta dikena ngaga 11 buah indu opis polis enggau enam buah opis polis, seraya RM170 juta ungkup ngemanahka ICT lalu RM100 juta dikena ngangkatmanahka sistem komunikasyen.

    “Menteri Besai mega bisi ngemendarka 10,000 unit rumah deka digaga ungkup bala polis,” ku iya nambah.

    Nangkan nya, iya beratika RM250 juta raban Volunteer (Rela), agih belanja pemadu tinggi ungkup Rela naka ke diatu.

    “Tu ungkup penyikap perengka guna nyengkaum uniform,” ku iya. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: