Program SKSJ ulih nempa ulah penguna jalai ti mereti - Berita Iban Online

Header Ads

  • Baru Nyadi

    Program SKSJ ulih nempa ulah penguna jalai ti mereti

    Ding Kuong Hiing
    BINTANGOR: Kenyau ari program ‘Satu Komuniti Satu Jabatan Pengangkutan Jalan (JPJ)’ (SKSJ) dipejalai dalam taun 2009 dataika November taun tu, dia penyampau pesereta di serata Sarawak ke mujur bulih lisin tu iya nya 21,283 iku.

    Kaban Kunsil Nengeri (ADUN) Meradong, Ding Kuong Hiing madah, seraya di serata Malaysia sepenyampau 135,726 iku chalun mujur teulihka pemaik ari program tu.

    “Nyentuk diatu, bisi 35 renggat Program SKSJ udah dipejalai di Sarawak, seraya di serata Malaysia udah diatur 40 renggat.

    “Pemisi pengawa ngatur program tu, perintah ngarapka semua penguna jalai alun, sekalika ari kandang mengeri enggau menua pesisir ulih ngemeranka ulah deriba ti mereti sereta ngemeratka semua pekara pengelikun.

    “Program tu mega nyadi siti ari pengawa raban JPJ bejalaika servis perintah ngagai selampur menua nyentuk ngagai komuniti menua pesisir, kelebih agi orang tuai ngambi ngembuan lisin deriba mutusikal kelas B2 ti sah,” ku Ding.

    Iya mansutka jaku nya rambau Pengawa Nutup Program SKSJ di Stadium Chen Ling Mei Sekula Sekondari (SMK) Kai Chung Bintangor, kemari.

    Rambau program sekali tu, sepenyampau 2,666 iku chalun udah mujur bulih lisin deriba B2, ke alai 1,764 pesereta ari sida ke lelaki seraya 902 iku da agi indu.

    Ba lansa bukai, Direktor JPJ Nengeri Sarawak, Mohd Syafiq Anas Abdullah dalam jaku pengelalu iya rambau atur pengawa nya madahka statistik 2016 nunjukka 63 peratus penusah bebadi sida ti nepan mutusikal.

    Di nengeri Sarawak ku iya, dalam taun 2016 aja, bisi 20,065 kes penusah bebadi udah dirikod.

    “Ari penyampau nya, iya udah nunjukka penambah 4.6 peratus enti dibanding enggau taun 2015 iya nya 19,130 kes.

    “Ba pengawa nagang semua penanggul nya, JPJ nyadi sebuah ejensi bejalaika pengawa enggau neritka adat udah bejalaika mayuh macham pengawa dikena nagang kelebih agi ba tetiap serak enggau renggat umur.

    “Antara iya baka pengawa numbuhka Skuad Muda 1JPJ, tim Kadet JPJ di semua sekula di menua tu, Program MyLesen, Program MyLesen GDL enggau Program MyPrihatin.

    “Semua pengawa tu dikena nambahka penyedar ngagai bala komuniti ba pemesai guna nitihka atur jalai alun sereta mega mantu sida ti kurang penatai pemisi ngulihka lisin ti sah,” ku Mohd.

    Ngelansa pasal pengawa ngaga Kompleks JPJ Sarikei ke baru, ku Mohd, sebuah kompleks ti disikap enggau begunan opis baru, kandang sita enggau perengka guna ke bukai udah berengkah digaga taun tu.

    Ku iya, begunana nya beungkus RM22 juta lalu digaga di Jalai Repok Sarikei sereta kurang lebih 3 kilometer penyauh ari indu mengeri.

    “Kompleks tu deka digaga urung 12 ikar pemesai lalu deka tembu dalam taun 2020.

    “Penembu kompleks tu ila deka meri pengelantang ngagai semua orang ti deka ngatur pengawa enggau raban JPJ,” ku Mohd nyemetak.

    Sama bisi datai Residen Bagi Menua Sarikei, Mohamad Junaidi Mohidin, Pemesai Pelilih Meradong, Haron Mahidi, Ketuai Pampang JPJ Sarikei, Pemesai Penerit Adat Nurul Fairezzah Safri sereta bala ketuai raban bansa di menua nya. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads