Projek ‘Community Charity Drive’ penyendia mantu orang tasah - Berita Iban Online

Header Ads

  • Baru Nyadi

    Projek ‘Community Charity Drive’ penyendia mantu orang tasah

    GERAH JARI: (Duduk, tengah) Lo enggau (duduk, empat ari kiba) Goh nesau orang mayuh ngambika gerah jari meri pemeri baka gari sereta barang pemakai rangkai nengah projek SUPP Batu Kitang ‘Community Charity Drive’, dikena mantu orang tasah baka ke kena ampuh bah.
    KUCHING: Parti Sa’ati Rakyat Sarawak (SUPP) Pampang Batu Kitang bejalaika projek komuniti iya nya ‘Community Charity Drive’.

    Kaban Kunsil Nengeri (ADUN) Batu Kitang, Lo Khere Chiang madahka projek nya mekuh ngagai pengawa pampang nya nyikap diri betapi enggau penasah kelebih agi maya musim pengujan ke suah ngasuh ampuh bah nyadi.

    Nengah projek SUPP Batu Kitang Community Charity Drive nya, pampang nya ngumpul pemeri baka gari sereta barang pemakai rangkai ngambika bisi dikena mantu baka orang ti kena penusah ngenyit ampuh bah enggau ke bukai.

    “Projek SUPP Batu Kitang Community Charity Drive tu sebengkah aktiviti ke dipejalaika sebedau penusah ngenyit nyadi baka ampuh bah sereta penusah bukai ke enda disadang nyadi.

    “Lalu kami (SUPP Batu Kitang) mega meransang sereta mai SUPP pampang bukai bejalaika projek tauka aktiviti ke sama baka tu.

    “Nengah projek tu kami tauka kitai deka beserakup ngumpul pemeri baka gari ke udah dikena tang agi manah dikena sereta pemakai ke tan baka beras, ai enggau ke bukai, ngambika bisi dikena mantu orang ke tasah,” ku iya ti mega Chairman Majlis Pebandaran Padawan (MPP).

    Lo mansutka pekara nya dalam aum pengarang berita projek nya ke diatur ba Palan Servis ADUN Batu Kitang ba Batu 6 1/2 Jalai Penrissen ditu, kemari.

    Nyerumba enggau ngintu Hari Krismas enggau penegap runding deka meri, Community Charity Drive beguna amat dikena dikena ngenataika pemeri ngagai orang ti begunaka bantu.

    Nambahka nya, dalam bulan Disember ti suah nyadi musim pengujan lalu kandang endur ke baruh dalam sitak Batu Kitang lalu projek nya dikearapka ulih dikena orang ti tasah ampuh bah enggau penusah ngenyit ke bukai.

    Kelimpah ari nya Sekretari Pengatur projek nya, Gerald Goh madahka mensia mayuh ke sama deka meri bantu ulih nganjung bantu baka gari sereta barang pemakai ngagai palan ngumpul bantu ti dipejalaika begulai enggau palan bebeli barang di mengeri tu.

    “Mensia mayuh ke deka nyuaka pemeri tau datai ngagai palan pengumpul ke bisi disediaka komiti baka ba Palan Bebeli Barang Boulevard, Viva City enggau The Spring.

    “Palan ngumpul tu deka dibuka ari pukul 10 pagi ngagai pukul 10 malam kena 8 - 10 Disember; 15 - 17 Disember enggau 22 ngagai 24 Disember tu,” ku iya dalam aum pengarang berita ke sama.

    Nitihku Goh, komiti mega bisi nyendiaka palan ngumpul barang berengkah 1 ngagai 23 Disember 2017 ari pukul 10 pagi nggai 12 tengah hari sereta ari pukul 2 lemai nggai 4 lemai ba SK Chung Hua Batu 4 1/2.

    Kelimpah ari nya orang ke gerah jari tau betanya ngagai Palan SUPP Batu 10 ba lumur 082-611210 enggau Palan Servis Khidmat SUPP Pampang Batu Kitang ba lumur 019-8199060.

    Sama bisi datai ba aum pengarang berita nya kemari raban ari SUPP Pampang Batu Kitang enggau ke bukai. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads