Raban nembiak patut ngena awak nambahka penatai pemisi nengah DE - Berita Iban Online

Header Ads

  • Baru Nyadi

    Raban nembiak patut ngena awak nambahka penatai pemisi nengah DE

    Adriel Nyawai Robin
    KUCHING: Raban nembiak rebak baru patut nemu sereta ngambi awak ke bisi disediaka perintah nengah penumbuh ekonomi digital (DE) kelebih agi dikena ngangkatka tikas pengidup.

    “Pengawa numbuhka polisi ekonomi digital endang engkeman kemaya hari tu kelebih agi dalam napi ubah pemansang tikas ekonomi dunya.

    “Berindik ari polisi tu diatu, ke mega lalu dikaul enggau sistem dunya ke nadai sekat nengah teknologi pemadah enggau komunikasyen (ICT), raban nembiak ulih ngambi bagi kelebih agi sentang ngaga pansik bekaul chara dikena ngangkatka penatai pemisi sekalika nengah pengawa dagang, servis tauka pekara bukai nengah ‘on-line’,” pia ku Adriel Nyawai Robin iya nya entara pengari raban nembiak ari Krangan Mong, Lubok Antu.

    Iya ke mega kala megai gelar Keling Raban Ngepan Iban (RNI) Renggat Nengeri madahka penemu Kepala Menteri Datuk Patinggi Abang Johari Tun Openg iya nya entara runding ti jauh ke mua ti dekaka nengeri Sarawak ulih besemekih enggau menua mansang ke bukai kelebih agi dalam pemansang industri seriris enggau juluk Revolusyen Industri 4.0.

    “Ekonomi digital tu entara polisi ti holistik ti ukai semina meri pemerat bekaul ngangkatka tikas ekonomi dalam pengawa dagang tauka e-dagang, tang mega nyengkaum pemansang perengka guna tauka teknologi dalam sektor industri.

    “Ambika chunto diatu mayuh kereban tauka dalam jaku industri disebut ‘instrument’ ke udah diangkatmanah ngambi ulih ngemuntangka semua pengawa, kelebih agi ti bekaul enggau teknologi digital. Penemu kepala menteri ti bechuntoka menua Estonia dalam pekara bekaul teknologi digital endang nerima puji ari semua,” ku iya nandu.

    Beserimbai enggau nya, Adriel ti mega siku staf siti kompeni minyak enggau gis ti mansang dalam menua tu ngelalau raban nembiak ngambika enda tepawah runding lebuh begunaka internet tang ngena awak ke bisi nya dikena ngangkatka tikas pengidup nengah bemacham chara.

    “Kena pemisi internet enggau memanah, kelebih agi dikena nambahka penatai pemisi. Gempung pengelandik ke diuwan kitai siku-siku enggau pemansang teknologi digital dikena ngangkatka tikas pengidup.

    “Raban nembiak diatu mega patut ngena pengelandik diri, enda ngira ba servis, ngaga asil pengelandik jari, tauka pekara bukai enggau betul. Tentuka pengelandik nya ulih dikena besemekih ukai semina dalam menua tu, tang mega di menua luar ngambika kitai ulih nyapai juluk menua mansang ba taun 2020,” ku Adriel nyemetak. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads