Header Ads

  • Berita Tebaru

    Riot ngelempaika pejalai politik iya ba perintah BN, pengundi

    Dato Sri Richard Riot Jaem
    KUCHING: Dato Sri Richard Riot Jaem ke udah enam penggal nyadi Kaban Parlimen (MP) Serian ngelempaika pejalai politik iya ba bala ketuai tetinggi Barisan Nasional (BN) enggau bala pengundi di Serian berindik ari pekara politik ti rapas ke diatu.

    “Ukai aku ti mutuska nya. Pekara tu bepanggai ba Menteri Besai enggau Sapit Menteri Besai ti ngaga pemutus sekalika deka ngirai aku maya Pengawa Bepilih Besai Ke-14 (PRU14) ti deka datai.

    “Tentu mega nyema aku disabung BN, nya bepanggai ba peranak di Serian ngundi aku tauka enda.

    “Ba penemu aku empu, aku chakah ngaul diri dalam politik kenyau ari taun 1990 lalu udah betapi enggau bemacham pemar ti suah ditapi dalam politik,” ku Riot madah ngagai The Borneo Post ditu, kemari.

    Menteri Pengatur Pekereja napi pengerapas dalam politik pengudah Skeretari Politik iya, Major (bepinchin) Datuk Peter Runin ditan Komiti Nagang Pengawa Makai Suap Malaysia (SPRM) apin lama ke udah laban pengawa salah guna wang ti ngaul penyampau RM40 juta.

    Nambah ke nya, bisi berita angin ti madahka nengah dokumen ti ‘tiris’ ari ejensi bepenemu ti udah dikerembai ke alai iya (Riot) enda disabung rambau pengawa bepilih sekali tu. Pekara tu udah ngasuh abis nadai enam iku chalun bukai deka ngelobi penuduk nya ngarika BN.

    Antara enam iku sida tu, empat iku pemegai PhD iya nya Dr Jerry Clarence, 50 an ari Kampung Bunga, Associate Professor Dr Novel Lindon, 42, ari Kampung Krait, Dr Alim Impira, 50 lalu megai pangku pengawa tinggi pemesai Opis Kastam Dr Ambrose Dango, 50 ari Kampung Pulau Pranuk, pengajar sekula sekondari Joseph Tiam, 50, enggau Pengelicha Kanan Palan Pematih Pengajar (IPG) Batu Lintang Charlie Ungang, 54.

    Lebuhka dikerandau, Sapit Presiden Serakup Dayak Bidayuh Nasional (DBNA) Charliemadahka, iya udah lama bejalaika pengawa di pun menua laban mantu semua komuniti ari Lundu, Bau enggau Serian ngambi sereta minta pala tanah Adat Bansa Asal (NCR) sida.

    “Kami udah gawa ngagai pun menua mantu bala komuniti kami minta pala tanah NCR. Nya alai, nadai pengamat kami tu ngemeranka politik. Berita ngerimbas pending di Serian diatu nya berita baru ba aku. Taja pia, nyadi ketuai tangga ti kedua, aku deka nerima pekara tu nyema diberi BN peluang,” ku Charlie.

    Tang ba raban penyakal, Edward Endrew Luwak ari DAP, udah tumu ngenukuka diri, ke alai iya deka bediri minta pilih seraya Presiden Serakup Iban Remun Sarawak (SIRA) Elli Luntai, pengajar, 50 taun, mega diberita deka bediri minta pilih, ngarapka diri nyadi chalun ngatika diri laban Serian nyadi siti ari tiga sitak majoriti Bidayuh. Dua sitak ke bukai iya nya Puncak Borneo enggau Mas Gading.

    Sitak Parlimen Serian mungkur tiga penuduk kunsil nengeri, benama Tebedu, Bukit Semuja enggau Kedup, semua tu di baruh PBB.

    Kaban Kunsil Nengeri (ADUN) Bukit Semuja, John Ilus madah iya tekenyit enggau berita nya tang ngenukuka PBB deka meri sukung barang sapa ti deka disabung BN.

    “Tang baka ti diperatika kitai, Dato Sri Richard Riot baka bala bukai. Nya alai, nyema iya dipilih. Aku andal iya agi ulih ngetanka penudah nya,” ku John.

    Ba lansa ke bukai, berebak enggau nya, Presiden SUPP Datuk Dr Sim Kui Hian enda ulih dikangau minta timbal.

    Dalam PRU suba, Riot, ke mega Sapit Presiden SUPP, nyadi siku aja chalun ari parti nya ti menang ngalahka penyakal, ba tujuh penuduk ti diperebut.

    Riot bulih 13,427 undi majoriti, ngelaban Edward enggau niang Johnny Aput ari STAR. Serian bisi 33,764 iku pengundi rejista. #UtusanBorneo

    No comments

    Post Top Ad