Sama besaup mutarka penanggul dadah - Berita Iban Online

Header Ads

  • Baru Nyadi

    Sama besaup mutarka penanggul dadah

    BESAUP MUNASKA DADAH: Minta Perintah numbuhka mekanisma sereta beratika nembiak ari menua luar ke nampung pelajar ditu, ngemataka sida ti kala bisi rikod bekaul enggau dadah tauka enda, ku Fatimah (gambar)
    KUCHING: Mensia mayuh berasai irau ati enggau ulah sekeda orang ti chukup berani bejualka dadah enda belalai maya siang hari baka ti di ‘viral’ ba laman rama ke bisi nyadi ba Genturung Pendiau Sin Sin, Jalai Astana.

    Menteri Pengelantang Pendiau, Orang Indu, Komuniti, Ruang Bilik enggau Pemansang Anak Mit, Dato Sri Fatimah Abdullah madah, PDRM bisi netapka urung 30 ngagai 40 peratus pengawa salah ke digaga ba reta, lalu 27 peratus nyadi ba pengawa salah domestik bekaul enggau dadah.

    “Kitai dalam dewan tu semua nemu, pengawa ngemunaska dadah tu siti pengawa ke pedis diputarka.

    “Ketegal nya, aram kitai mutarka penanggul tu, ngambi pulaika pengelantang enggau pemaik Nengeri  Sarawak,” ku Fatimah.

    Iya madah munyi nya lebuh nyimpul jurai jaku ba aum hari ke-6, Aum Kunsil Nengeri ditu, kemari.

    Ku iya baru, ngambika penanggul tu diputar enggau sistematik sereta nyulut agi, opis menteri iya beratika  nempa kaul begulai enggau ejensi Opis Kandang Menua (PBT) nyekat bekal dadah dalam makit nengah ejensi ke bekuasa kelebih agi baka PDRM enggau Opis Kastam.

    “Nangkan nya, ngurangka peminta dadah nengah pengawa (nagang) sereta ngiri penemu, ngubat sereta ngeraika orang ke gian dadah sereta nambahka kuasa sereta penegap runding komuniti,” ku iya.

    Iya mega madah, opis menteri iya setuju enggau langgur penemu ari PBT, ngambika Opis Kimia enggau Opis Pengerai ba renggat nengeri Sarawak diberi perengka dikena meresa ai kemi.

    “Kelimpah ari nya, numbuhka kort sereta nempa modal mensia ba renggat pelilih menua ngambika ulih mutarka kes enggau jampat lalu ulih ngurangka kes ke udah lama.

    “Ngaga ‘Intoxicating Substance Act’ patut dipasukka dalam undang-undang laban empas k esebaka enggau dadah, ambika chunto baka gam, chat, gasolin enggau ‘ likuer thinner’.

    “Nagang orang ari luar  tama ke Sarawak ti bisi rikod pengawa salah ba dadah ari baruh ADB (Langkah-Langkah Pencegahan Khas) 1985,” ku iya.

    Kelimpah ari nya, atur bukai nyengkaum numbuhka mekanisma sereta beratika nembiak ari menua luar ke nampung pelajar ditu, ngemataka bala nembiak ke kala bisi rikod bekaul enggau dadah tauka enda, ku iya.

    Siti agi chara ju iya, numbuhka mekanisma mutarka penanggul gian sereta nyual dadah nengah chara  “snowballing” dikena ngulihka pemadah ari nembiak sekula tauka universiti ke ditemu positif ai kemi. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads