Sarawak deka nyadi pengeksport pemadu besai produk pemakai 2030 - Berita Iban Online

Header Ads

  • Baru Nyadi

    Sarawak deka nyadi pengeksport pemadu besai produk pemakai 2030

    MANAH AMAI: Uggah rindu meda produk ti diasilka peranak menua nya.
    SARIKEI: Sarawak datai ba taun 2030 bisi tagit nyadi nengeri pengeksport besai produk pemakai enggau buah pemadu besai di Malaysia.

    Sapit Kelapa Menteri Sarawak, Datuk Amar Douglas Uggah Embas madah dikena nyapai juluk enggau misyen nya, komitmen semua piak beguna endar, kelebih agi chakah gawa dalam sektor betanam enggau betupi.

    “Nengah bemacham pelin enggau perambu ti udah disediaka perintah kemaya hari, kitai andal amat tagit tu deka ulih dijapai.

    “Baka ti udah ditemu kitai, Sarawak bisi mayuh pengelebih ngambika ngerembai lalu nyadi sebuah nengeri pemansut besai produk pemakai di menua tu.

    “Kebuah pia laban komuniti di nengeri tu bagas gawa sereta bisi tanah ti besai diperimba nyadi palan pemansut utai tanam, kelimpah ari bemacham bantu ti disediaka perintah dikena ngerembaika sektor tu,” ku iya.

    Uggah mansutka jaku tu lebuh bejadika Pesta Nanas enggau Buah Sarikei 2017, ensanus.

    Pengawa tu udah diatur di Panggu Besai Laman Balai Suarah Sarikei lalu udah digulu urung 1,500 iku pengusung.

    Nitih ku Uggah, kandang diatu Sarawak udah ngimport RM4 biliun produk pemakai ari menua luar dikena nampung peminta peranak ditu.

    Nya alai ku iya, penyampau nya patut dikurang enggau meri penyedar sereta iring ngagai komuniti ti chakah ngaul diri dalam sektor betanam ngambika nukar chara enggau gaya sida ngereja iya.

    “Nyema diatu bala komuniti kitai ngereja iya ungkup belanja diri empu, tang dikena nentuka juluk nempa Sarawak nyadi pemansut besai produk pemakai, chara nya patut diubah.

    “Gaya komesial enggau besai agi patut dikena ngulihka asil betanam ti mayuh agi.

    “Nya kebuah perintah keran endar ngemai bekenaka teknologi moden ngagai sida ti gawa dalam sektor betanam dikena ngelempung tating sida ngereja kebun dandang besai enggau industri betanam betupi sida,” ku iya nandu nyemetak.

    Berebak enggau nya, Douglas ke lalu nyadi Menteri Betanam Betupi Moden, Tanah Adat enggau Pemansang Kandang Menua mega bisi ngemendarka agih belanja penyampau RM50,000 ngagai Komiti Pengatur Pesta Nanas enggau Buah Sarikei 2017.

    Sama bisi datai Menteri Muda Perambu Mengeri, Pengatur Tanah enggau Rampa Menua ke lalu nyadi Kaban Kunsil Nengeri (ADUN) Kuala Rajang, Datu Len Talif Salleh, ADUN Repok, Datu Sri Huang Tiong Sii, ADUN Meradong, Ding Kuong Hiing, ADUN Pakan ke mega Kaban Parlimen (MP) Saratok Tan Sri William Mawan Ikom, ADUN Meluan, Rolland Duat Jubin, MP Julau Datuk Joseph Salang Gandum sereta Residen Bagi Menua Sarikei, Mohamad Junaidi. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads