Sarawak Pay untung lebih RM106,000 dalam lapan hari - Berita Iban Online

Header Ads

  • Baru Nyadi

    Sarawak Pay untung lebih RM106,000 dalam lapan hari

    Datuk Patinggi Abang Johari Tun Openg
    MIRI: Kitai enda tau enda nyadi orang sereta menua ke bisi juluk laban kitai nadai pilih enti kitai deka ngemansangka menua kitai, ku Kepala Menteri, Datuk Patinggi Abang Johari Tun Openg.

    Penyampau mensia ke diau di Sarawak ku iya, manggai urung 2.7 juta, tang Petara nya bepengeraja, laban kitai diberekat enggau mayuh pemisi.

    “Tang pemisi nya enda tau enda di proses, sereta kitai begunaka makit, alai kitai ulih nyual produk kitai. Nya alai, bakani ku kitai datai ba makit nya? Iya nya nengah e-dagang, siti pekara bejual beli digital (DT), alai Sarawak deka ngena DT tu,” ku iya, ke madahka Sarawak udah ngepunka siti aplikasi ke dikumbai ‘Sarawak Pay’.

    Sarawak Pay ku iya, dalam kandang 8 hari, penyampau penguntung Sarawak Pay lebih RM106,000.

    Iya madah munyi nya lebuh bejaku ngepunka atur pengawa ‘Kenyalang Journalism Awards’ (KJA) 2017 ti digulu ulih urung lebih 500 pengarang berita ari serata menua Sarawak ke bepekitka gelar KJA 2017 di sebengkah hotel ditu, malam kemari.

    “Gabenor Bank Negara nyadang Sarawak Pay patut mega dikerembai ke Semenanjung Malaysia. Kitai (Sarawak) nyadi sebuah sitak menua ke mungkal Sarawak Pay, kelimpah ari Bank Negara meri kelala Sarawak nyadi sebuah menua ke mungkal bayar nengah Sarawak Pay,” ku iya.

    Abang Johari ti mega nyadi Menteri Wang enggau Perambu Ekonomi nandu baru madahka perundingka enti Sarawak Pay dibuka di Semenanjung Malaysia tauka ba sitak bukai, semua utai kena kitai bebayar, semina ngena talipaun binching aja mayar barang ke dibeli kitai.

    “Tu pemungkal chara ke enda ngena mata duit di Sarawak… Manah ke kitai laban kitai ke mungkal,” ku iya.

    Iya mega madahka menua Singapore nengah Sapit Menteri Besai sida iya tu tadi, lebuh nemuai ngagai Kuching, minta Perintah Menua Sarawak ngaitka Sarawak Pay nya enggau Singapore Pay ke baru dipungkalka dalam kandang 8 bulan tu ke udah.

    “Aku besetuju, lalu minta Bank Negara (BN) ngemendarka nya laban iya bekait entara Perintah ngagai Perintah (G2G).

    “Enti pekara nya nyadi nyata, kitai semina mai talipaun binching kitai di Singapore, lalu kitai ulih mayar transaksi kitai di Singapore, lalu baka nya mega rayat Singapore ke deka bebayarka barang sida iya lebuh sida iya di menua kitai.

    “Pemujur nya manag ke pengawa dagang temuai kitai, laban temuai enda ibuh mai duit tang semina ngena ‘Aplikasi’ nya,” ku iya.

    Nya alai ku iya, enti udah dikemendarka ulih Bank Negara, Sarawak Pay ulih dikena di Singapore.

    “Dalam kandang dua bulan tu aja, kitai ulih ngena teknologi baru, FINTECH (Financial Transaction) ulih Perintah Menua Sarawak,” ku iya. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads