Header Ads

  • Berita Tebaru

    Sebengkah komiti deka ditumbuh nasat kes kayu dirampas di Bintulu

    DATAI BEJADI: Abang Johari diambat raban pengereja pengawa ari opis perintah lebuh bejadi ‘Amanat Integriti Bersama YAB Ketua Menteri Sarawak’ ti digulu lebih 800 iku pengereja pengawa ba opis perintah nyengkaum pemesai menua enggau penyakal.
    KUCHING: Siti unit pengelikun ngatika diri ari baruh Opis Kepala Menteri udah dipinta nasat kes kayu ti beungkus bejuta ringgit ke dirampas di Bintulu bedau lama ke udah, ti dipadah Opis Kampung ‘nadai kes’.

    Kepala Menteri Datuk Patinggi Abang Johari Tun Openg madah sebengkah komiti deka ditumbuhka nasat pekara nya, ke alai dalam komiti nya ukai semina ari Opis Kampung aja tang mega nyengkaum raban ari gerempung ngatika diri ke bukai.

    “Kami (ba Opis Kepala Menteri) bisi unit pengelikun kami empu, lalu orang tu ke deka nasat kes tu begulai enggau gerempung ti ngatika diri nya,” ku Abang Johari.

    Iya madah munyi nya lebuh dikerandau pengudah bejadi ‘Amanat Integriti Bersama YAB Ketua Menteri Sarawak’ ke diatur berambai leka jaku‘Memperkasa Integriti & Tadbir Urus Untuk Pembangunan Mapan’ ti digulu menteri kabinet, menteri muda, Kaban Kunsil Nengeri (ADUN), pengereja pengawa ba opis perintah, Opis Kandang Menua, nyengkaum sekeda ari parti penyakal, di sebuah hotel ditu, kemari.

    Ba atur pengawa nya mega, Sapit Kepala Menteri ti mega Menteri Kedua Pemansang Mengeri enggau Rampa Menua, Datuk Amar Awang Tengah Ali Hasan madahka iya udah ngasuh ejensi bukai nasat pekara nya, tang ukai ari Opis Kampung.

    “Aku enda nemu bagi komiti ke dipadah sida (Opis Kampung) nasat pekara tu tang tentu ukai komiti ‘anti-logging’ ti bechairmanka aku.

    “Aku udah ngasuh pekara tu ditasat enggau naka pengelengkas, komiti ‘anti-logging’ mungkur mayuh bengkah ejensi bukai nyengkaum Opis Penagang Makai Suap (SPRM),” ku iya.

    Kepala Menteri enggau Awang Tengah nimbal pasal berita ke dipansutka ba surat berita The Borneo Post ke alai berita kepala berita nya ditulis ‘Puzzled over release of seized logs, machinery worth millions’ ti dipansutka kena 1 November tu tadi, ke alai Direktor Opis Kampung (JHS) Sapuan Ahmad netapka bisi kayu enggau injin dirampas maya ambas ngenyit nya ketegal berimba kayu enggau nadai pemendar.

    Nitihku artikel nya, dalam bulan Ogos tu tadi sebengkah pengawa ngabas ngenyit udah diatur begulai enggau sebuah kompeni sereta Opis Sarawak Forestry Corporation (SFC) mujur ngerampas kayu enggau injin berat ke dipelabaka beungkus RM7 juta. #UtusanBorneo

    No comments

    Post Top Ad