Semangat begempung ulih nentuka penegap BN Sarawak - Berita Iban Online

Header Ads

  • Baru Nyadi

    Semangat begempung ulih nentuka penegap BN Sarawak

    BEJADI: Uggah ngarika kepala menteri bepegai jari enggau Tiong sereta bala bukai nunda lambang baru PDP.
    KUCHING: Semangat begempung enggau kerejasama semua parti komponen Barisan Nasional (BN) Sarawak meseti seruran ditan dikena nentukan BN di Sarawak deka seruran tegap sereta meruan relevan.

    Kepala Menteri Datuk Patinggi Abang Johari Tun Openg madahka semangat begempung enggau kerejasama rat nya ti mai pemujur besai ngagai BN rambau Pengawa Bepilih Nengeri (PRN) suba di baruh pegai Niang Pehin Sri Adenan Satem.

    “Nyadi Chairman BN Sarawak, aku tetap ngenang penaluk bala kaban PDP ngagai parti, mega ngagai BN taja sida napi bemacham pemar enggau penekul.

    “Tu meh semangat ti patut dikemeran kelebih agi napi jeman ngangkatka Sarawak nyadi sebuah ekonomi digital dalam timpuh 10 tauka 20 taun ti deka datai,” ku iya nengah jaku ti dibacha Sapit Kepala Menteri Datuk Amar Douglas Uggah Embas.

    Abang Johari mega meri pengaga ati ngagai Chairman PDP Datuk Seri Tiong King Sing sereta semua kaban parti nyerumba pengawa ngelancharka lambang enggau nama baru parti nya.

    “Terima kasih ngagai kita semua, taja bisi ubah ba lambang enggau nama parti, kita semua seruran taluk ngagai parti enggau BN.

    “Aram kitai bela terus ngetanka konsep bekunsika kuasa, konsultasyen, bebasaka pangan diri sereta bekerejasama dalam ruang bilik besai BN,” ku iya.

    Ku Abang Johari, nyadi Kepala Menteri Sarawak, iya udah berundingka chara pemadu manah ngemansangka nengeri tu laban chara bukai enda agi ulih ngemai Sarawak ngagai jeman ekonomi ti belalauka teknologi digital.

    Chara ekonomi konvensional belalauka pemansut ku iya enda agi ulih nyungkak ekonomi Sarawak ngagai tikas diasaika menua udah mansang baka Estonia.

    “Estonia nyadi sebuah menua mit sereta seratan ti kala diperintah Rusia tang udah ulih nyadi menua mansang dalam timpuh pandak.

    “Aku begulai enggau raban ari Sarawak udah bejalai nemuai ke Estonia dalam bulan nyin tadi seraya belajar baka ni sida tau nyadi menua mansang ti meri pemerat ba teknologi digital ba tebal agi atur pengawa di menua nya,” ku iya.

    Nitih ku iya, diatu jeman ekonomi ti nyual servis semina nengah aplikasyen tau diupload dalam telefon binching sereta tau disambung ba sebarang alai seagi bisi sambung Internet.

    Nya kebuah ku iya, infrastruktur komunikasyen enggau multi-media di nengeri tu meseti datai ba tikas ti tau nyukung aktiviti dalam ‘masa sebenar’ ngambika e-dagang nengeri ulih dipejalai enggau lanchar sereta jampat.

    “Bidang betanam betupi kitai mega patut diubah ngagai pengawa betanam betupi ti profit-driven, badu agi betanam ti tebal agi bepanggai ba subsidi enggau bantu perintah.

    “Nya alai, kitai deka ngubah chara ngenataika bantu subsidi ngagai chara nyediaka ‘venture capital’ ngagai raban orang bumai,” ku iya.

    Ku iya, ba pengawa nya, Perintah Nengeri nyediaka agih belanja RM100 juta dikena nyediaka puku ngagai raban orang bumai, berikan tauka betupi ti ila deka dibayar di par value, iya nya RM1 dibayar pulai RM1.

    “Aku udah suah madah, Sarawak patut nentuka pengidup kediri empu. Kitai enda ulih bepanggai tauka ngandalka orang bukai meri bantu ngagai kitai.

    “Nyema bisi bantu diberi, kitai meri terima kasih tang kitai empu patut nentuka kuing pengidup kitai empu dudi hari,” ku iya nandu nyemetak. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads