Semina PRS ulih nentuka chalun ungkup sitak Julau - Berita Iban Online

Header Ads

  • Baru Nyadi

    Semina PRS ulih nentuka chalun ungkup sitak Julau

    Datuk Joseph Salang Gandum
    Sebedau tu bisi didinga sentang orang bukai nguji ngirai diri deka bediri ba penuduk nya.

    JULAU: Semina Parti Rayat Sarawak (PRS) tang ukai parti komponen Barisan Nasional (BN) ke bukai ulih nentuka sapa bagi chalun BN bediri ba Parlimen Julau maya pengawa bepilih ti deka datai.

    Sekretari Besai PRS Datuk Joseph Salang Gandum madah, sebedau tu bala raban parti bisi madah ngagai iya sentang bisi orang bukai udah bejalai nguji ngirai diri empu deka bediri ba penuduk nya.

    “Pengawa baka tu nadai mai reti. Penuduk Parlimen Julau ke diatu dipegai PRS lalu semina PRS aja ulih nentuka chalun parti bediri ditu.

    “Orang bukai nadai kuasa meri pemutus sapa bagi chalun ditu.

    “Pia mega PRS nadai hak ngasuh parti komponen BN ke bukai milih sapa bediri ba Parlimen Julau,” pia ku iya madah.

    Iya mantaika jaku tu maya Pengerami Pemesai Begulai enggau Rayat ba Rumah Unjah Mani, Nanga Luau, Julau, kilah ensana.

    Salang ti mega Kaban Parlimen (MP) Julau maya tu madah, raban parti ke deka nemu enggau silik sentang pekara nya tau terus betanya ngagai Presiden PRS Tan Sri Dr James Jemut Masing tauka pemesai ke bukai dalam parti nya.

    “Pia mega sida raban parti komponen ke bukai tau nanya ngagai presiden sida nyema parti sida engka diasuh ngiga chalun baru ba penuduk ti ukai enggi sida,” ku iya nerang.

    Berindik ari nya, Salang ngelalau sida ke deka nyadi chalun ngambika enda ngena chara ke enda manah dikena nyaguka diri dipilih nyadi chalun.

    “Tang enti kita deka ngena chara baka nya, kita semina deka nambahka agi orang ke begedi meda kitai tang ukai orang ke nyukung nyema kita dipilih nyadi chalun ila.

    “Rayat nemu beratika ulah enggau jaku ti dipansut alai sida tau nemu kita tau nyadi chalun tauka enda,” pia ku iya madah baru.

    Bekenangka penuduk iya ba Parlimen Julau, ku Salang, Presiden parti sida udah mantaika nama iya beberapa kali sebedau tu alai iya deka dipilih baru ngetanka penuduk Parlimen Julau.

    “Aku semampai besedia ngetanka penuduk tu laban aku nadai penanggul bukai baikka ba pengerai tauka penanggul ba diri empu.

    “Aku mengkang agi chakah gawa ke rayat di Parlimen Julau ditu,” ku iya ti udah nyadi MP Julau ba pengelama empat penggal.

    Bekaul enggau isu lama ti madahka iya ukai orang menua nya empu, ku Salang, pekara tu enda nekul rayat dia mengkang nyukung iya baru baka 18 taun ke udah.

    “Mayuh kaban belayan aku ditu, di Pakan tauka di Bayong (Ulu Sarikei) madahka diri besaup engau aku maya betapi enggau sida ti bekenaka isu tu kenyau ari empat kali pengawa bepilih sebedau tu,” ku iya madah baru.

    Dulu agi ari nya, Salang mega bisi niki Rumah Mambang Kana di Nanga Lingah bejadi projek bekal karan rumah panjai 33 pintu nya. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads