Semua komuniti patut besaup nempa rebak baru ke bekualiti - Berita Iban Online

Header Ads

  • Baru Nyadi

    Semua komuniti patut besaup nempa rebak baru ke bekualiti

    Basil Thomas
    SARATOK: Dikena nyapai Transformasyen Nasional 2050 (TN50) nempa rebak baru ti bisi kualiti sereta bepenau dudi hari, semua serak komuniti patut bejalaika pangku pengawa sida empu lalu ukai ngelempaika tanggungpengawa ngagai siti raban aja.

    Pelobi Parti Demokratik Progresif (PDP), Parlimen P205 Saratok, Basil Thomas madah, pemar dunya pelajar kemaya hari endang mayuh, nya kebuah beguna amat semua komuniti patut besaup enggau raban sekula dikena nempa rebak ngambika nyadi raban ke ulih ngiring menua enggau manah.

    “Baka ti ditemu kitai, pemanah empas polisi pelajar menua nyadi pugu pemun ba pejalai pemansang modal mensia enggau pemansang ke bukai ngagai menua.

    “Juluk deka nempa Malaysia nyadi sebuah menua mansang endang bepanggai ba penau bala pengajar nyediaka pelajar menyana, ti ngemeratka pemansang mensia ti holistik sereta ngemansangka daya inovasyen enggau kreativiti nembiak.

    “Kebuah pia, ba pemerat perintah ke alai bala pengajar nyadi siti keresa ti pemadu berega sereta nyadi siti barang penengkebang menua dudi hari,” ku iya.

    Basil mansutka jaku nya rambau Pengerami Makai Lemai Serakup Apai Indai enggau Pengajar (PIBG) Sekula Primari (SK) Supok, ensanus.

    Pengerami tu udah digulu urung 250 iku datai ari bala apai indai sereta peranak diau besemak.

    Nitih ku Basil, apai indai mega nyadi kaban PIBG ngambika bela bekerejasama enggau bala pengajar, kelebih agi ba pengawa nempa bala nembiak ti nyulut sereta bisi kualiti.

    Ku iya, PIBG chakah mantu raban sekula ba pengawa ngambuh bala nembiak, kelebih agi ba pekara bekaul disiplin sida.

    “Kemaya hari, penanggul disiplin nembiak majak nyadi. Nya alai, dikena nempa disiplin ti tegap, bala kaban PIBG patut besaup enggau raban sekula.

    “Kelimpah ari nya, PIBG tau bejalaika pangku pengawa enggau nitihka pemansang pelajar, mantu nambahka belanja sereta ngerapitka agi pemanah tanggam kaul antara pengajar enggau komuniti.

    “Apai indai enggau PIBG patut besaup, bekunsika penemu enggau kereban dikena neruska agenda sekula dikena nyapai juluk pengajar nyulut, nembiak tebilang enggau sekula pegari nama. Reti iya, sebarang pengawa ti deka dipejalai meseti seriris enggau juluk ngambika ngintu nasit pengidup nembiak sekula tu jemah,” ku Basil nyemetak madah.

    Ngelansa pasal isu tanah Adat Bansa Asal (NCR) ti benung nyadi batang randau diatu, ku penemu Basil, nyema perintah Nengeri bedau ulih netapka sebarang pemutus ti patut, sida (perintah nengeri) patut ngelanjarka semua pechara kes ti bekaul enggau isu nya.

    “Pengawa tu beguna endar laban isu tu endang berat sereta patut diperunding nitihka pematut.

    “Semua pengawa ngakim kes tanah NCR patut dilanjar seraya nganti pengawa ngubah Akta Tanah Sarawak dipejalai,” ku Basil nandu nyemetak.

    Berebak enggau pengerami nya, Basil mega bisi nyuaka pemeri ari kuchik iya empu ngagai PIBG SK Supok.

    Sama bisi datai Kepala Pengajar SK Supok, Sawi Suhaili, Chairman PIBG SK Supok, Maling Tingang, Kaunsilor Peter Gon, Kaunsilor Rajau sereta bala ketuai komuniti ari tujuh buah rumah panjai besemak. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads