Semua tim peninju di menua tu bela nyereta PGGK 2017 - Berita Iban Online

Header Ads

  • Baru Nyadi

    Semua tim peninju di menua tu bela nyereta PGGK 2017

    Dato Rahman Lariwoo
    SIBU: Urung 76 peninju ari serata menua udah ngenuku diri nyereta Pekit Golden Glove Kebangsaan (PGGK) 2017 ke diatur berengkah 27 November nyentuk 3 Disember tu bepalan ba Stadium Tertutup Sibu.

    Pekit tu diatur begulai Gerempung Tinju Sarawak, Kaunsil Lumba enggau Main Nengeri Sarawak (MSNS) Bagi Menua Sibu enggau Opis Menteri Nembiak enggau Lumba lalu Raban Soldadu Malaysia (ATM) nyadi penyanding penemu.

    Tu deka dipasuk semua tim nengeri ba menua tu nyengkaum tim Raban Soldadu Malaysia (ATM) enggau Felda.

    “Tuju ngatur pekit dikena ngiga peninju ke ulih ngarika menua ba pekit sebaka ba tikas Asia Tenggara.

    “Kelimpah nya, iya mega dikena ngelakuka main tinju ditu seriris enggau juluk Sarawak deka nyadi kuasa main tinju di menua tu,” ku Presidan Gerempung Tinju Sarawak Dato Rahman Lariwoo rambau aum media ditu, apin lama ke udah.

    Sama bisi datai Panglima Briged Ke-31 Infrantri Malaysia Rejimen Adan Menua Brigedier Jeneral Dato Fadzil Tajudin enggau Ketuai Zon Tengah MSNS Sibu Gloria James.

    Nitihku Rahman, pekit tu ila deka dipenyadika Menteri Muda Pelajar enggau Pansik Teknologi Dr Annuar Rapa’ee kena 27 November lalu pengawa nutup iya deka dipenyadika Menteri Wang Kedua Dato Sri Wong Soon Koh kena 3 Disember.

    Kenu ku iya, pekit tu deka dibagi ngagai 9 kategori ke mungkur 18 taun ke atas enggau baruh 40 taun.

    “Pekit deka berengkah pukul 2 lemai nyentuk 9 malam bepanggai ngagai kategori pekit,” ku iya seraya madah final genap kategori deka diatur 3 Disember.

    Udah nya, mensia mayuh diperansang ngemataka pekit tu laban masuk ke stadium nadai bebayar.

    “Kelimpah nya, mensia mayuh mega bepeluang menang tikit benasit ke udah disedia komiti pengatur,” ku iya.

    Maya tu ila, ku Rahman, ex-peninju menua ke kala menang midul emas ba Lumba Komanwel 1998 Mejar Sapok Biki mega deka datai. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads