Header Ads

  • Berita Tebaru

    Servis kaunseling engkeman dikena ngemansangka komuniti

    Datuk Francis Harden Hollis
    SRI AMAN: Servis Kaunseling dipeda nyadi siti servis pemun ti diguna mensia mayuh nyapai juluk ati sida, pia ku Menteri Muda Pengelantang Komuniti Sarawak, Datuk Francis Harden Hollis.

    Nitih ku iya, servis kaunseling tu suah nyadi batang randau komuniti ke mansang agi laban komuniti majak mansang, tanggungpengawa individu dalam komuniti nyadi mayuh.

    “Pekara tu ditegapka agi enggau penemu Gladding (2000) ti madahka kaunseling majak mansang laban servis tu ilih mantu sida ti bepenanggul enggau raya,” ku iya lebuh bejadika Pengawa Ngelanjarka Bengkal Raban Kaunsilor ‘Touching With The Heart’ diatur Opis Pemansang Indu Sarawak di sebengkah hotel, semak ditu, bedau lama.

    Harden ke mega Kaban Kunsil Nengeri (ADUN) Simanggang nambah, pengawa ngatur bengkel tu setipak enggau tuju iya dikena ngulihka pekara pemun ba penemu psikologi mensia kelimpah meretika peminta, konsep enggau teknik bukai kaunseling ke patut bisi ba raban kaunsilor.

    “Pengawa ngatur bengkel tu mega engkeman endar ba pekara meretika gaya penanggul nembiak kemaya hari ngena chara kaunseling enggau Art Theraphy ungkup intervensyen sereta meretika bida psikologi lelaki enggau indu lalu udah nya ngena chara kaunseling mantu sida tu,” ku iya.

    Pia mega ku iya, tetiap mensia meseti dipeda nengah konteks gaya ti nyadi ba diri enggau gaya ti ngasuh penanggul nyadi, meretika baka ni, nama kebuah lalu lapa, ngambika ulih diterima pekara ke amat lalu ulih dilangkar tuju pengidup ti nyata agi, bisi reti.

    “Enti diperati ari sukut tu, tuju mega nyadi siti pejalai pengawa ti dinamik, dalam pejalai pengidup di dunya ti mayuh pemar sereta rapas.

    “Penanggul individu ti bekaul enggau tusut runding, psikologi, ulah diri, enda lantang ati, tebal agi bepun ari sida empu laban enda meretika diri enggau gaya pekara ke nyadi sereta nadai pengandal ba pengidup nyata,” ku iya nampung.

    Nya alai, kemaya hari tu kitai patut meri lalau enggau penemu ba chara ti betul lalu endang patut diajar teknik enggau penemu kaunseling ke alai bala komuniti ti deka nyadi volunteer kelebih agi sida ti ngaul diri ba pengawa ‘pemudahcara’ ti diau begulai enggau bala komuniti.

    Berebak enggau nya, bisi 71 iku pesereta udah nyereta bengkel nya, datai ari bala kaban Gempung Ukai Dikuasa Perintah (NGO), bala staf perintah, pekereja rama enggau volunteer diau besemak Pelilih Sri Aman.

    Sama bisi datai ba pengawa ngelanjarka program nya, Direktor Opis Raban Indu enggau Ruang Bilik Sarawak, Norian Ahmad sereta Ketuai Pemesai Eksekutif HIKMAH Sarawak, Alwi Morshidi. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: