SGH beguna bekal darah ninting hari - Berita Iban Online

Header Ads

  • Baru Nyadi

    SGH beguna bekal darah ninting hari

    PENYELAMAT NYAWA: Dr. Sim (tengah) begambar enggau orang ke meri darah rambau Hari Meri Darah Sedunya di Kuching.
    250 iku diguna meri darah ninting hari ngambika bisi stok nyelamatka nyawa.

    KUCHING: Sepital Besai Sarawak (SGH) begunaka 250 iku orang meri darah ninting hari, ku Menteri Opis Kunsil Kandang Menua enggau Pengawa Berumah Datuk Dr. Sim Kui Huan.

    Ku iya, stok darah nya diguna ngambi ulih dikena nyelamatka nyawa kelimpah ti nentuka stok ba bank darah SGH seruran bisi.

    “Aku ngasai penyampau 250 iku orang meri darah ninting hari di SGH ulih dijapai ketegal penyampau peranak Kuching diatu udah manggai 700,000,”ku iya.

    Dr. Sim mansutka jaku nya ba pengawa meri basa ngagai orang meri darah ke diatur nyerumba Hari Orang Meri Darah Sedunya Renggat Kuching ba Palan Bebeli Barang Boulevard ditu, kemari.

    Iya nambah, tetiap iku orang ulih meri darah empat kali setaun iya nya dalam timpuh tiga bulan sekali.

    ‘Dalam timpuh tiga bulan pengudah meri darah, sistem darah ba tubuh tetiap iku kitai deka 100 peratus manah,’ku iya.

    Nitihka statistik ku Dr. Sim, ba taun 2016 sepenyampau 20,941 iku orang udah meri darah lalu naka bulan September taun tu penyampau 15,273 dirikod.

    Ngenang kaul ke sama, iya madah SGH melanja RM100,000 ninting bulan ba pengawa nentuka darah nya likun dipasukka ba tubuh penerima.

    Kelimpah meri basa ngagai orang meri darah ke pemadu suah, pengerami mega meri basa ngagai gerempung, ejensi, palan pelajar tinggi, institusyen agama enggau korporat ti udah suah ngadu program ke sama.

    Organisasyen ti suah ngadu program ngelaku kimpin meri darah mega diberi tanda basa rambau pengerami.

    Serak tu, 20 iku lelaki enggau 13 iku orang indu nerima Anugerah Penderma darah 2017 ti disuaka Dr. Sim.

    Bela datai Sapit Direktor SGH (Berubat) Dr. Hayati Ja’far, Pakar berubat Transfusi Dr. Wong Yi Shen enggau orang bukai. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads