Siku indai tunggal untung besai nyual martabak boom - Berita Iban Online

Header Ads

  • Baru Nyadi

    Siku indai tunggal untung besai nyual martabak boom

    ENDA MANTUL NGAPA: Zuriah mandangka martabak ke udah mansau ba palan dagang iya di Tebing Sungai Kuching apin lama ke udah. -Gambar #Bernama
    KUCHING: Urung empat taun ke udah, siku indu nupi diri pengudah lali iya ke mega pinchin soldadu midang ketegal penyakit strok.

    Lebih sinu maya nya, Zuriah Abdul Hamid, 39, benung ribat empat bulan iya nya anak kelapan iya.

    Lebuh bekunsika pendiau diri ngagai Bernama, Zuriah madah pengidup nupi diri begulai enggau tujuh iku sida tu chukup pedis, tang meransang diri ke pemaik pengidup bala anak dudi hari.

    “Maya nya aku semina beratika dagang ‘martabak boom’ sebedau tu semina dikereja ba bulan Ramadan tauka bisi pengerami begulai enggau niang laki aku kenyau ari 1998, semina nya aja chara dikena nupi kami sebilik,’ ku iya.

    Asal ari Kampung Gita Laut ditu, Zuriah madah iya teperansang lebuh Kaban Kunsil Nengeri Tupong maya nya, niang Datuk Daud Abdul Rahman (midang taun 2017) bisi meri peransang ngasuh aku bejalaika pengawa dagang dikena ngiga belanja.

    Ku iya, dikena ngelai sukung, niang ngudar 1,000 iti martabak boom dinah ba rumah program ngelaluka pengabang iya ba hari ketiga pengerami Aidifitri 2013.

    “Aku ngadaka anak kelapan ba hari raya keterubah, pansut ari sepital ba hari raya kedua, udah nya disaup menyadi enggau anak tuai aku Muhd Azri Rafiq Khamis ke pasar meli perengka digaga martabak nya,” ku iya.

    Ku iya, bepun ari nya iya majak ransing agi bemodalka resipi digaga niang laki iya ke asal ari Johor, iya bejalaika pengawa nyual martabak ba sekeda endur ba kandang mengeri besai tu.

    “Urung taun 2016, aku dilawa pemesai Opis Pengintu Pengelantang Pendiau Raban Bansa (JKM) Sarawak deka mantu dagang martabak boom nengah program Usahawan Mikro Kebajikan (UMK). Aku nerima perengka baka palan bejual, dapur sereta sekeda perengka bukai beungkus RM5,000 dikena ngemanahka dagang.

    “Sebedau nya aku bisi ngulu kus ngaga pemakai diatur sekeda ejensi baka Palan Pansik enggau Pemansang Betanam Betupi Malaysia (MARDI) enggau Opis Pemansang Raban Bansa (Kemas),” ku iya.

    Zuriah madah dalam timpuh setaun iya nyereta UMK lalu pemansang dagang dipatau JKM, dia iya minta pansut ari program pengudah ulih ngereja pengawa kediri sereta ngembuan penatai pemisi ke ngemantup ati.

    “Aku minta pansut ari program laban ngasai agi bisi orang bukai ti lebih begunaka bantu. Puji Tuhan Oktober (2017) tu tadi, aku nerima Anugerah Usahawan Mikro Kebajikan diberi ngagai klien JKM ke udah ulih ngereja pengawa kediri sereta ngasilka penatai pemisi kediri empu tauka tetap sereta nadai bepanggai ngagai JKM agi,” ku iya.

    Ngasaika program UMK chukup manah, Zuriah ngelalau bala indai tunggal anang enda ngerebut peluang nya.

    “Mayuh kus bisi disedia ungkup pesereta UMK baka Program Pemansang Runding, kami diajar baka ni ngemansangka diri.

    “Nuju baka indai tunggal anang kelalu baruh ati, enti udah labuh anang ngelakka diri labuh. Angkat, perati mua bala anak, perundingka pengidup sida dudi hari lalu kereja pengawa nitihka pengulih diri lalu ulih ngasilka penatai pemisi,” ku iya seraya madah diatu anak tuai iya Muhd Azri Rafiq, 18, mega bejalaika pengawa dagang martabak boom. #Bernama

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads