SOS deka ngatur Program Ngurangka Berat Tubuh ba taun 2018 - Berita Iban Online

Header Ads

  • Baru Nyadi

    SOS deka ngatur Program Ngurangka Berat Tubuh ba taun 2018

    NERANG: Fatimah nerang rintai lumba enggau main SO ba 2018 ngagai pengarang berita sepengudah ngulu AGM SOS di Sibu, kemari.
    SIBU: Urung 60 peratus atlit Special Olympics Sarawak (SOS) napi penanggul kelalu berat tubuh.

    Menteri Pengintu Pengelantang, Pengelikun Mensia Mayuh, Orang Indu, Ruang Bilik enggau Pemansang Nembiak Mit Dato Sri Fatimah Abdullah madah, ketegal nya SOS deka ngatur Program Ngurangka Berat Tubuh berengkah ari taun ti deka datai.

    “Nya alai, sebengkah ari batang pekara ke deka diatur SOS ti mungkur SO Kuching, SO Miri enggau SO Sibu taun 2018 iya nya ngaga program tu.

    “Tang ba SO Sibu, sida udah ngaga program tu alai dalam kandang enam bulan siku nembiak mujur ngurangka semilan kilogram pemerat iya ari 123 kilogram sebedau nya,” pia ku iya maya aum media ditu, kemari.

    Iya mantaika pekara nya sepengudah betuaika Aum Besai Ninting Taun (AGM) SOS di sebuah hotel ditu.

    Fatimah ti mega Chairperson SOS madah, penanggul tu bepun ari gaya pengidup iya nya penyayau apai indai ngagai anak ti naka alah ngintu anak nyengkaum ba pekara pemakai.

    “Kelimpah ari nya, tu mega nyadi ketegal bisi bala nembiak tu enda dapat ngereja pengawa bukai, semina duduk aja laban bepenanggul ba fizikal,” ku iya madah baru.

    Berebak enggau tu, Fatimah bela ngelalau apai indai ke bisi ngembuan anak timpang pendiau beratika ulah anak sida sereta beratika gaya pemakai anak.

    “Enti kelalu berat tubuh tau nejuka penusah bukai nyadi baka ‘hypertension’, diabetes tauka penyakit tungkul ati,” ku iya madah.

    Fatimah mega madah, batang program kedua ke digaga SOS taun 2018 iya nya bekaul enggau pengawa ngerijista nembiak ba SOS.

    Iya madah, piak sida ransing deka ngerijister nembiak baikka ari sekula khas, program Pemulihan Dalam Komuniti (PDK) tauka ba komuniti empu.

    “Kitai deka meda sida dirijister ba SOS laban gerempung tu meri sida awak baka nembiak bepengerai ke bukai bela ngambi bagi ba lumba enggau main.

    “Sida patut diberi awak ke sebaka baik ngarika SO sitak diri empu tauka nengeri, renggat menua lalu enti ulih deka besemekih ba lumba enggau main renggat dunya,” ku iya madah.

    Nambahka nya, Fatimah bela ngerintai lumba enggau main ke deka diatur tauka digulu SOS ba taun 2018.

    Bulan November, SO Miri deka ngatur SO Borneo Cup ke deka digulu Brunei, Indonesia, Brunei, Sabah enggau Labuan.

    Sebedau nya, SO Kuching bisi ngatur SO Lumba enggau Main renggat nengeri ke diperambu ba bulan Ogos.

    “Ari lumba tikas nengeri ke sebaka sebedau tu, kitai deka milih atlit ngarika nengeri tu ba SO Lumba enggau Main renggat menua ke deka diatur di Kuala Lumpur kena 5-8 April 2018,” ku iya nerang.

    Fatimah mega ngarapka bisi atlit nengeri tu dipilih ngambi bagi ba SO lumba enggau main renggat dunya ke deka diatur di Abu Dhabi taun 2019 ila.

    SOS ditumbuhka ba taun 1999 lalu naka ke diatu bisi tiga iti pampang iya nya SOS Kuching, Miri enggau Sibu sereta bisi 859 iku atlit.

    Nembiak ba SOS tu ari sekula khas, PDK enggau ari komuniti ti bisi napi penanggul baka ‘Disleksia’, ‘Hyperaktif’, ‘Autisme’ enggau ‘Sindrom Down’. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads