Tanah NCR dalam Batu Danau agi mayuh bedau disukat kelingi - Berita Iban Online

Header Ads

  • Baru Nyadi

    Tanah NCR dalam Batu Danau agi mayuh bedau disukat kelingi

    Paulus Palu Gumbang
    KUCHING: Taja pan perintah besai bisi udah ngungkupka belanja dikena bejalaika pengawa nyukat kelingi tanah Adat Bansa Asal (NCR) tang agi mayuh kandang endur ke bedau disukat nyengkaum dalam Kunsil Nengeri (DUN) Batu Danau.

    Paulus Palu Gumbang (BN-Batu Danau) beterima kasih ngagai perintah besai laban ti udah ngungkupka sepenyampau RM30 juta dikena bejalaika pengawa nyukat kelingi tanah NCR.

    “Aku minta ngambika sekeda ari ungkup belanja nya dikena bejalaika pengawa nyukat dalam sitak Batu Danau.

    “Agi mayuh tanah NCR ke bedau disukat taja pan peminta udah dikenataika ngagai Opis Tanah enggau Survei.

    “Lalu ba kandang endur ke beserak, aku meri penemu ngambika ba ke beserak nya dikeluarka lalu pengawa nyukat patut diteruska ba kandang endur ke enda beserak,” ku iya.

     Paulus ngenang isu ke nyadi ba sitak iya lebuh ti bejuraika Rang Undang-undang Perbekalan (2018), 2017 enggau Mosyen ke dibantaika Kepala Menteri ba  Aum Kedua Penggal Kedua Aum Kunsil Nengeri Sarawak Ke-18 ke diatur ba Kompleks DUN ditu, kemari.

     Bejaku baru iya, Paulus minta perintah nengah opis betanam betupi bejalaika pengawa mansik bekaul enggau peluang ngemansang tauka nanam padi sereta  benih ke ulih mantu ngangkatka produk pemakai nengeri.

    “Aku arap bendar, enti chakah dikemansangka, bagi menua Limbang ulih nyadi sebengkah ‘periuk’ asi nengeri,” ku iya ti mega madahka diri nyukung bajet 2018. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads