Tanggungpengawa sekula nentuka juluk menua ulih dijapai - Berita Iban Online

Header Ads

  • Baru Nyadi

    Tanggungpengawa sekula nentuka juluk menua ulih dijapai

    Datuk Francis Harden Hollis
    Kerejasama rat semua piak ulih nentuka bala nembiak nerima penemu ti manah ungkup pemansang menua, ku Harden.

    SRI AMAN: Sekula megai tanggungpengawa ti beguna endar dikena nyapai juluk menua kelimpah nyadi palan bala nembiak ngiri penemu ti tau nempa mayuh agi peranak ke mujur sereta ulih gawaka agenda pemansang menua.

    “Taja pia, pengawa tu meseti nerima sukung enggau kerejasama rat ari semua piak kelebih agi bala pengajar, Gerempung Apai Indai enggau Pengajar (PIBG) sereta komuniti di menua nya,” pia ku Menteri Muda Pengelantang Komuniti Sarawak, Datuk Francis Harden Hollis.

    Nitih ku iya, dalam jeman tu bemacham pekara tau nyadi ngagai kitai ke alai pemansang teknologi arus pemadah enggau penyambung (ICT) nempa fenomena globalisasyen ‘Dunya Nadai Sekat’.

    “Dikena nentuka seruran ulih ngasaika pengelantang napi pemar dunya tu, kitai patut nyedia sereta nyikap bala nembiak ngena bemacham penemu, pengelandik tinggi ti inovatif, ngembuan pemanah ulah ba pengawa nambahka penau rebak baru napi ubah ngena penyikar,” ku iya.

    Iya ke mega Kaban Kunsil Nengeri (ADUN) Simanggang mansutka jaku nya lebuh bejaku bejadika Pengerami Konvokesyen Ke-39 Tadika Simanggang bepalan di Balai Suarah semak ditu, malam tadi.

    Ku iya, dikena ngenegapka bemacham penemu, penau berandau kelebih agi dalam Jaku English sereta ngiri bemacham pengelandik ngagai bala nembiak nyadi agenda besai di sesebuah sekula.

    Taja pia ku iya, pengawa nguasa penemu enggau pengegap aja enda chukup nyema pekara pemanah ulah enda nyadika lalau. Pemanah ulah tu deka nunjuka jalai sereta nyadi lalau laban nyadi pun ulah ti menuku dikena lalau ba pengidup di dunya mayuh pemar tu.

    Ku Harden nampung silik agi, pemansang modal mensia tu patut dikerandau ngena chara ti patut sereta begempung. Semua penau enggau pengulih bala nembiak ulih dikemansang enggau efektif.

    “Kitai enggai semina ngadaka orang ti nyulut ba akademik aja, tang rebak baru ti sebela pemansang ari sukut fizikal, runding, ulah enggau intelektual, bisi disiplin diri ti tinggi, gap gaya, talukka menua sereta nadai ngembuan ulah ngira diri empu aja sereta ulih megai tanggungpengawa dalam komuniti.

    “Pengawa tu seriris enggau dua ari enam teras strategik Pelan Induk Pembangunan Pendidikan (PIPP) iya nya ngadaka menua bansa enggau ngemansangka modal mensia. PIPP nyadi pelasar pemadu manah dikena mansang nuju juluk perintah nyapai status menua mansang datai ba taun 2020,” ku iya nerang silik.

    Nya alai, kaul pengawa tegap antara sekula enggau PIBG deka nempa sekula bisi aspirasyen agi ngangkatka pemanah penyapai akademik enggau kokurikulum nembiak ngambika terus nyulut sereta ulih nambahka agi pengawa ngaul diri enggau penau bala apai indai sereta bala komuniti ngagai sekula. Kaul rat enggau manah tu deka ngemanahka agi rampa belajar ti kondusif, pemaik iya pulai ngagai bala nembiak,” tandu iya.

    Sama bisi datai, Pemancha Lee Siang Hua, Chairaman Serakup Soon Heng Simanggang, Datuk Tan Chong Meng sereta bala bukai.

    Bisi 85 iku nembiak Tabika nerima perais rambau atur pengerami nya, semak ditu, malam tadi. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads