Terima kasih laban udah milih Kuching endur ngatur WIEF Ke-13, ku Awang Tengah - Berita Iban Online

Header Ads

  • Baru Nyadi

    Terima kasih laban udah milih Kuching endur ngatur WIEF Ke-13, ku Awang Tengah

    KE PENGINGAT: Awang Tengah disempulang Musa (empat kanan) sereta (ari kiba) Naroden, Morshidi, Wong enggau Asfia (kanan) begambar bebala mayuh.
    KUCHING: Sarawak untung endar dipilih nyadi tuai rumah endur ngatur Forum Ekonomi Islam Sedunia (WIEF) Ke-13 setipak enggau pengeran sereta juluk perintah nengeri ngemansangka ekonomi digital.

    Kepala Menteri Datuk Patinggi Abang Johari Tun Openg madah, enggau penatai pesereta sereta pengelicha antarabansa, nya udah tentu nyadi pelasar ti pemadu manah alai bekunsika penemu enggau peneleba ba forum nya.

    Nya alai ku iya Sarawak amat beterima kasih ngagai Yayasan WIEF ke udah milih Kuching nyadi palan endur ngatur aum ke sekali tu.

    “Sarawak untung endar nerima pesereta enggau pengelicha antarabansa ti bekunsi penemu enggau peneleba ba forum tu.

    “Sarawak benung betapi enggau transformasyen sosio-ekonomi iya nya ari nengeri betanam betupi berubah ngagai pemansang ekonomi baru nyengkaum mintak enggau gis, betanam betupi komersial, teknologi tinggi enggau sektor servis,” ku iya.

    Iya mansutka pekara nya nengah teks iya ti dibacha Sapit Kepala Menteri Datuk Amar Awang Tengah Ali Hasan, ti ngarika iya ba pengerami serumpu makai nyambut penatai deligit WIEF Ke-13 ba Hotel Pullman ditu, malam ensanus.

    Berebak enggau tu Abang Johari ngarapka semua deligit ke datai ngulu forum nya ulih ngiga peluang sereta bejalai meda penyelai enggau pemanah palan dagang temuai ke bisi ditu.

    “Sarawak nengeri ti nyelai sereta manah dikelala enggau pengaya pengeraja asal, main asal enggau peneleba ti bebida.

    “Kami mega bisi lebih 28 etnik ti diau dalam penuh pemaik enggau pengelantang, nya alai ambi mih peluang tu bejalai meda penyelai ke dikemisika kami ditu,” ku iya.

    Kelimpah ari nya, Chairman Yayasan WIEF, Tun Musa Hitam madahka forum ke benung diatur ba mengeri besai tu deka neruska asal forum diatur iya nya enda negu isu bekaul enggau politik sereta jalai pengarap.

    Iya madahka nya setipak enggau objektif penumbuh yayasan nya, lalu aum nya mekuh ngagai randau pengawa dagang enggau bejual.

    “Kitai deka ngiga lebih mayuh peluang dagang ti mekuh ngagai pengerembai ekonomi digital.

    “Setipak enggau polisi perintah nengeri Sarawak ti mekuh ngagai ekonomi digital dikena ngemansangka nengeri,”ku iya.

    Berebak enggau tu Musa madahka, bisi 2,476 deligit ari 75 buah menua serata dunya ti ngunukuka diri nyereta WIEF Ke-13 ti diatur pengelama tiga hari, iya nya nyentuk Hari Empat tu.

    Ku iya, Kuching palan kedua endur ngatur WIEF Ke-13 di luar Kuala Lumpur pengudah Johor Bahru.

    Musa madahka, sida setuju ngatur WIEF di Kuching pengudah nerima kanggau ari Abang Johari, maya ngulu WIEF di Jakarta, Indonesia taun nyin kemari.

    Sama bisi datai Menteri Wang Kedua, Dato Sri Wong Soon Koh, Sekretari Besai Yayasan WIEF Tan Sri Mohd Fuzi Abdul Razak, Speaker Kunsil NengeriSarawak Datuk Amar Awang Asfia Awang Nassar, Menteri Muda Pemansang Dagang Mit enggau Jelan Pemesai (PKS) enggau Orang Dagang Datuk Mohd Naroden Majais, Sekretari Perintah Nengeri Tan Sri Datuk Amar Mohd Morshidi Abdul Ghani, enggau temuai ti dipebasa ke bukai. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads