Tetiap gerempung patut ulih nerima ubah pemansang DE - Berita Iban Online

Header Ads

  • Baru Nyadi

    Tetiap gerempung patut ulih nerima ubah pemansang DE

    JASA:Shamsuddin (tiga kanan) nyuaka tepa ngagai Talib seraya dikemata Mohidin, Barry, Kadier (kiba), Mataip Rosli enggau Kederi (kanan).
    Ari empas ekonomi digital mayuh pekara udah berubah ti begunaka kaban gerempung nyikap diri enggau napi pemansang.

    BINTULU: Bala kaban gerempung kelebih agi Gerempung Melanau Bintulu (PMB) patut ulih nerima ubah sereta nyadi pemungkal enggau ngemeranka ekonomi digital (DE) ti dipejalaika Kepala Menteri Datuk Patinggi Abang Johari Tun Abang Openg ba pengawa meri servis ngagai peranak di menua nya.

     Menteri di Opis Kepala Menteri (Integriti enggau Ombudsman) ke lalu nyadi Kaban Kunsil Nengeri (ADUN) Jepak, Datuk Talib Zulpilip madahka komunikasyen diatu udah berubah lalu mansang agi begunaka bala kaban gerempung napi ubah sereta nyikap diri ngambika sida ulih gawaka komuniti memanah.

     “Ubah tu beguna endar ngambika kitai enda tinggal ba dunya pemansang kemaya hari, nya kebuah kitai patut meretika ubah ti nyadi sekalika dalam pelajar, kereja enggau ke bukai,” ku iya lebuh bejadika Pengerami Makai Lemai Pengasih Serakup Melanau Bintulu (PMB)di sebuah hotel tebilang ditu, malam kilah ensana.

     Sama bisi datai Pemesai Pelilih Bintulu, Mataip Sayu; Penyanding Penemu 1 enggau 2 PMB, Datu Mohidin Ishak enggau Pemancha Rosli Kamaruddin; Chariman PMB, Shamsuddin Abdul Razak; sapit iya, Ketuai Bansa Kederi Junaidi; Temenggung Datuk Barry Yek; Direktor Ukai Bibas Bukan Eksekutif Serba Dinamik Holdings Berhad ke lalu nyadi Chairman Dewan Usahawan Bumiputera Sarawak (DUBS) Cawangan Bintulu, Abdul Kadier Sahib sereta bala kaban exco PMB.

     Talib andal bala kaban gerempung enggau gerempung nya empu nemu agi pasal gaya enggau ubah ti nyadi beratika pekara ke nyadi suba enggau ke diatu sereta dudi hari.

     Ba lansa ke bukai, iya meransang bala kaban gerempung seruran beintegriti, lurus, nyeliahka diri ari makai suap maya ngatur pengawa serakup sida ngambika terus mansang.

     “Aku beratika PMB ngemeranka pengawa nyadi ketuai ti manah sereta bejalaika tanggungpengawa ti dilempai enggau meruan kelimpah bejalaika mayuh program.

     Terus ka pemanah pengawa kita nyadi gerempung ti manah,” ku iya.

     Berindik ari pejalai program enggau projek ti betul ari serakup nya, iya nyamin deka seruran nyukung enggau ngagihka belanja dikena bejalaika aktiviti serakup nya.

     Talib nyemetak madah iya enggai meda serakup nya suntuk belanja ngujungka sida napi pemar bejalaika aktiviti ketegal salah guna belanja dalam serakup.

     Nangkan nya, ku Shamsuddin, randau dalam program ke diatu nya dikearap deka nyadi pelasar ngenegapka agi penyerakup, tanggam kaul enggau pengelantang bala kaban sereta komuniti besemak.

     “PMB mega dikearap deka meruan teguh sereta nyadi gerempung ti pegari nama di nengeri Sarawak,” ku iya dalam jaku ngelalu rambau program renggat kedua ti kala diatur PMB kenyau ari taun 2000.

     Nikalka kenang tipan jerita PMB, ku Shamsuddin, enda berasai PMB udah manggai 40 taun dalam taun baru lalu beberapa program enggau aktiviti udah dilanggur dikena ngintu genap taun penumbuh iya.

     Ku iya, dikena nyapai juluk nya, raban nya begunaka belanja ti chukup lalu Malam Pengasih nyadi antara pengawa nya sereta pemeri ari mayuh bengkah raban ukai semina dikena ungkup aktiviti PMB tang deka diberi ngagai Kompleks Kebajikan Anak-Anak Yatim Bintulu (PERYATIM) Bintulu. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads