Tiga buah klinik baru di Baram diangkat nyadi Klinik Kluster - Berita Iban Online

Header Ads

  • Baru Nyadi

    Tiga buah klinik baru di Baram diangkat nyadi Klinik Kluster

    Dr. Annuar Rapaee
    KUCHING: Nengah Langgur Pemansang Malaysia Lumpar Ke10 (RMK-10), bisi tiga buah klinik ke baru digaga ba sitak Baram, iya nya Klinik Pengerai Bario, Long Lama enggau Klinik Long Jengkitan, ke alai ketetiga klinik tu diangkatka nyadi klinik kluster.

    Menteri Muda Pengawa Berumah enggau Pengerai Mensia Mayuh Dr. Annuar Rapaee madah, sebuah agi klinik diatu benung deka digaga.

    “Klinik di Long San deka digaga lalu diatu benung dalam proses ngiga alai ngaga klinik nya.

    “Aku ngarapka ADUN (Kaban Kunsil Nengeri) Telang Usan bekerejasama enggau Opis Pengerai Menua ngiga endur ke engkeman alai ngaga klinik Long San, ngambika ulih meri pengelantang pendiau ngagai komuniti dia,” ku Dr. Annuar.

    Iya madah munyi nya lebuh nyaut tanya ADUN Telang Usan, Dennis Ngau ba Aum Kunsil Nengeri Hari Kelima di Komplek Kunsil Nengeri ditu, kemari.

    Sentang penanggul injin api ba sitak Baram ku iya, bisi 24 buah klinik dalam sitak Baram, ke alai ari penyampau nya 17 buah agi ngena injin api lalu tiga buah agi benung di sambung ngagai grid, lalu 4 buah klinik agi udah bisi elekterik, ku iya.

    “Ba penanggul diesel, pekara tu patut dikemeratka tang udah tu ila, siti diungkup ‘khas’ ari perintah nyambung grid di serata menua, ngambika semua klinik enti dibekal elektrik 24 jam,” ku iya.

    Iya mega madah, Opis Menteri Pengerai (KKM) dalam taun 2016, udah ngemendarka ungkup belanja urung RM274,000 dikena nguji tikas pengelikun sistem elektrik di 220 buah palan pengerai di Sarawak.

    “Ari 220 buah palan nya, 40 buah klinik ari baruh pegai Opis Pengerai Pelilih Menua (PKB) Miri udah diuji  kompeni ke kompeten sistem kabel ti begunaka ungkus  RM54,000 lalu 24 buah ari klinik pengerai nya di Baram,” ku iya.

    Dr. Annuar ti mega Menteri Muda Pelajar, Sains enggau Pansik Teknologi madah baru, dalam taun tu urung 19 buah klinik di Baram disengkaum dalam proses ngemanah sistem sambung wayar elektrik ti begunaka belanja urung RM1.07 juta.

    “Ungkup ke tetiap buah klinik enda sebaka laban nitihka skop pengawa ti digaga,” ku iya. #UtusanBorneo


    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads