‘Top-up’ Sarawak Pay ditiki ari RM200 ngagai RM3,000, ku Abang Johari - Berita Iban Online

Header Ads

  • Baru Nyadi

    ‘Top-up’ Sarawak Pay ditiki ari RM200 ngagai RM3,000, ku Abang Johari

    KE KELAI: Abang Johari (tengah) ngeletakka tanda sain ba bup maya ngelawa sebengkah ‘booth’ rambau ‘Karnival Kewangan Sarawak’ di Kuching kemari. Bela dipeda (ari kanan) Dr Sim enggau Muhammad.
    KUCHING: Penyampau ‘top-up’ Sarawak Pay ditiki ari RM200 ngagai RM3,000, ku Kepala Menteri Datuk Patinggi Abang Johari Tun Openg.

    Bejaku ba pengerami ngelanchar Karnival Kewangan Sarawak ditu kemari, iya madah pekara nya udah dikemendar Bank Negara Malaysia (BNM).

    “Kitai udah nerima pemendar ari Bank Negara Malaysia diak penyampau maksima ‘top-up’ Sarawak Pay ditiki ngagai RM3,000.

    “Enggau nya, peranak Sarawak ulih nguna servis bebayar perintah sereta ejensi bekaul nengah servis e-wallet tauka Sarawak Pay,”ku iya.

    Pengerami kemari bela digulu Gabenor BNM Tan Sri Muhammad Ibrahim.

    Sarawak Pay nyadi sebengkah inisiatif ti ditumbuhka Perintah Nengeri dikena mai transfomasyen Sarawak nuju ekonomi digital.

    Sarawak nyain Sempekat Pemereti Ati (MoU) enggau Huawei dikena ngemansang teknologi digital nya.

    Karnival Kewangan Sarawak di CityOne Megamall diatur tiga hari berunggu berengkah kemari nyentuk 26 November 2017.

    Karnival diatur enggau tuju nyendia penerang ngagai peranak Sarawak sentang servis ke bisi disedia mayuh bengkah bank di nengeri tu.

    Bela datai Sekretari Perintah Nengeri Tan Sri Datuk Amar Morshidi Abdul Ghani, Menteri Opis Kunsil Kandang Menua enggau Pengawa Berumah Datuk Dr Sim Kui Huan enggau orang bukai. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads