Ubah ba PM, PG dibantai ba Aum DUN taun 2018 - Berita Iban Online

Header Ads

  • Baru Nyadi

    Ubah ba PM, PG dibantai ba Aum DUN taun 2018

    Datuk Amar Douglas Uggah
    KUCHING: Ubah ba Kod Tanah Sarawak sentang Pemakai Menua enggau Pulau Galau disadang dibantai ba Aum DUN bulan Mei 2018.

    Berindik enggau nya Sapit Kepala Menteri Datuk Amar Douglas Uggah minta semua nganti dulu maya nya.

    “Perintah Nengeri disadang mantaika ubah sentang Pemakai Menua enggau Pulau Galau ba Aum DUN bulan Mei taun 2018,” ku iya seraya madah pansik sentang ubah nya dipejalai chara holistik.

    Uggah mansutka jaku nya lebuh nyimpul jurai Aum Dun Ke-18, Penggal Kedua ke diatur di Komplek DUN ditu, kemari.

    Ngenang kaul ke sama, iya madah pemansang tanah bansa asal seruran nyadi agenda besai ba pemansang pengawa betanam betupi enggau menua pesisir di Sarawak.

    Meretika pemesai guna pekara nya, Uggah madah ubah ba sentang model ‘joint venture’ serta nyendia model bukai ngambika tau dipilih orang bempu tanah dikemerat.

    “Naka ke diatu, penyampau tanah NCR ke udah dikemendar disukat 1.2 juta hektar ke alai 808,826 hektar udah disukat kelingi.

    “Ari penyampau nya, 643,017 hektar udah digazet nyadi tanah rizab bansa asal nengah Seksyen 6 Kod Tanah Sarawak,” ku iya.

    Iya nambah, ari penyampau ke digazet nengah Seksyen 6, 17,776 hektar udah diberi pala tanah nengah Seksyen 18 Kod Tanah Sarawak ti mungkur 15,351 lot.

    Uggah ke mega Menteri Betanam Betupi Moden, Tanah Adat enggau Pemansang kandang Menua nambah model ‘leasing’ deka dibantaika ba kabinet.

    “Bepelasarka peneleba ngemujur model JV nengah konsep pemansang tanah NCR ke dipun ba taun 1995 sereta dikemanah ba 2015, kitai meseti ngemanah model ke diatu kelimpah nyendia model bukai ngambi tau dipilih orang bempu tanah,” ku Uggah. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads