Header Ads

  • Berita Tebaru

    Ubah chara ngarang nyerunyut teknologi, tulis berita ke bekualiti

    BEJADI: Abang Johari (dua kanan) enggau Jong (empat kiba) ngaga pengawa simbolik ngepunka KJA 2017, malam kemari.
    MIRI: Siti ari gelar ‘khas’ ke nyadi kategori pekit pengarang berita nengah ‘Kenyalang Journalism Awards’ (KJA) 2017 ti digaga di Miri malam tadi, bekait enggau Ekonomi Digital (DE), ke diangkatka ulih Kepala Menteri Datuk Patinggi Abang Johari Tun Openg.

    “Nya kebuah aku nyadang gelar ‘khas’ tu, ke bisi bekait enggau ekonomi digital. Kemaya hari tu, kitai jarang macha surat berita tang mayuh agi bala kitai macha ‘e-paper’,” ku iya madah lebuh ngepunka atur pengawa KJA 2017 di sebengkah hotel entarabansa ditu, malam kemari.

    Penguntung macha ‘e-papers’ ari menua bukai, ku Abang Johari, laban nengah ‘e-papers’ ulih alai kitai ngambi mayuh penemu, lalu nemu penuduk kitai ba entara menua-menua ke besemak enggau kitai, ku iya.

    “Nya alai, DE digaga, ngambika mensia mayuh ulih macha ‘e-paper’, ukai agi macha surat berita ke endar.

    “Lalu baka nya mega, lebuh kitai ngaga ‘live streaming’, ke ulih diambi ngena talipaun binching aja, pechuma, lalu ulih dipeda video tekala nya, dibanding enggau suba, enti Perintah minta RTM ngaga ‘live telecast’, pengawa tu bebayar enggau rega ke chukup besai,” ku iya.

    Abang Johari ti mega nyadi Menteri Wang enggau Perambu Ekonomi madah teknologi bansa tu majak dikena, lalu raban pengarang berita enda tau enda nitihka jeman ke nyau berubah, nyengkaum pengarang berita begunaka sida iya nulis artikel ke manah lalu ukai bepelasarka artikel popular tang kualiti, nyengkaum artikel ‘feature’ ke bekunsika penemu kemaya hari tu ngagai dunya.

    “Tu gaya pengarang berita ke jampat ngaga tauka ngangkatka nama sida iya baka pengarang berita ari menua luar, bebansa British-Iran, Christiane Amanpour, ti mega nyadi Kepala Koresponden ke stesen CNN.

    “Iya siku pengarang berita ke enda besiping, baik iya bejaku pasal menua Timur Tengah, Rusia, Vaksin...Semua berita tu dikenataika nengah chara professional sereta enda besiping, tu gaya pengarang berita kedeka kitai ukai bepelasarka populariti.

    “Pengawa nyadi pengarang berita enda tau enda diangkatka, sereta bisi penuduk dalam dunya pengarang berita, laban kita enda tau enda bisi sabjek ke bekualiti dibantaika,” ku iya.

    Ngarika Perintah Menua Sarawak, Abang Johari ti mega mangku pengawa nyadi Menteri Pemansang Mengeri enggau Rampa Menua meri terima kasih ngagai pengarang berita ari menua tu.

    “Sida iya (pengarang berita) udah mayuh ngemanahka pengawa sida iya, lalu agi bisi endur alai sida iya mansang bepelasarka ba utai ke nyadi ba dunya kemaya hari tu, nyengkaum chara ngaga berita tauka ripot sida iya udah jauh berubah,” ku iya.

    Taja pan, ku iya, surat berita ke popular ulih ngaga mayuh duit tang kekadang tau ngachau pendiau rama kitai ke nguing ngagai pendiau ke enda normal.

    “Enti kita nulis artikel ke bekualiti, iya deka meri penguntung ngagai mayuh orang. Nya alai, aku beterima kasih ngagai surat berita di Sarawak laban udah ngaga (fair and balance reporting), ukai semina ngaga berita pasal Perintah, tang mega ngeripot pasal penyakal, taja pan kekadang enda lantang ati macha ripot bansa nya.

    “Enti ripot nya cherita ke bula tauka enda nitihka fakta, tentu kami ringat tang enti kita (pengarang berita) ngeripot utai ke amat ke mantaika pengurang Perintah, kami ulih nerima laban kitai mensia pan ukai semua ke sempurna,” ku iya.

    Iya nandu baru madahka, kemaya hari tu pan mensia mayuh ukai semina macha berita ba surat berita, tang mega nengah ‘online’ nyengkaum ba laman rama, Facebook (FB).

    “Enda salah kitai bisi FB, ba tiap pengawa kitai, enda tau enda betanggungjawab ba utai ke ditulis kitai. Anang ngumbai orang enda ulih meresai, opis ke megai kuasa bekait enggau siber ulih meresa utai ke ditulis kitai ba FB, orang ke bisi pengelandik teknologi nemu sapa orang ke ngaga berita nya ba FB,” ku iya.

    Ba atur pengawa KJA 2017 nya malam kemari, iya madah iya lantang ati meda pemayuh pengarang berita ke enggau bepekit, bisi nambah datai ngagai 60 persin (%).

    “Pemujur tu mandangka pekit tu meri peransang ngagai pengarang berita ngaga mayuh agi berita ke bekualiti,” ku iya.

    Ba pekit KJA 2017, spunsa besai ke enggau ngepunka atur pengawa nya nyengkaum Sarawak Energy (SEB), Sarawak Shell Berhad, Petronas enggau Perintah Menua Sarawak.

    Sama bisi ngulu atur pengawa nya kemari, bini Kepala Menteri, Datin Patinggi Dato Juma’ani Tunku Bujang, Menteri Opis Kandang Menua enggau Pengawa Berumah, Prof Datuk Dr Sim Hui Kian, Sapit Speaker Kunsil Nengeri, Datuk Gerawat Gala, Menteri Muda Pengawa Dagang Temuai, Seni enggau Main Asal, Datuk Lee Kim Shin, Menteri Muda Opis Kandang Menua (PBT) Datu Penguang Manggil, ex-Kepala Menteri Datuk Patinggi George Chan Hong Nam, chairman Serakup Pengarang Berita Sarawak pampang Miri, Andy Jong enggau sekeda pemesai bukai. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: