Unifor mantu gerempung jalai pengarap nirika rumah sembiang - Berita Iban Online

Header Ads

  • Baru Nyadi

    Unifor mantu gerempung jalai pengarap nirika rumah sembiang

    Datuk Amar Douglas Uggah Embas
    KUCHING: Unit ungkup Jalai Pengarap Bukai (Unifor) ti udah tujuh bulan ditumbuh dalam opis Sapit Kepala Menteri, betuju mantu gerempung jalai pengarap nirika rumah sembiang sida.

    Unifor mega mantu ngulihka tanah endur ngentak palan nya, pia ku Sapit Kepala Menteri Datuk Amar Douglas Uggah Embas lebuh bejadi Pengerami Makai Lemai Pengaga Ati, Ngelalu Penatai, Meri Selamat Jalai enggau Gerija St Francis, Samarahan di sebuh hotel ditu, kena malam Hari Minggu nyin tadi.

    “Siti ari pengawa Unifor iya nya mutarka isu ti nyadi ngelingi ba peminta tanah ungkup begunan jalai pengarap. Agi tubah gerempung ti nadai tanah. Kami deka mantu peminta lalu kami deka gawa rat begulai enggau Opis Tanah enggau Survei,” ku Uggah.

    Ku Uggah, deka bisi mekanisme ti deka nentuka peminta nya nadai bepenanggul dudi hari ba tanah ti dipinta sida tauka diberi nengeri tu.

    Iya mega ngansak gerempung nerima belanja ari sida ngambika bekelimat sereta lurus ba atur belanja sida.

    “Tentuka belanja dikena memanah. Kitai patut bekelimat ba tetiap sen belanja. Sida ti nerima deka dikira dalam unit kitai (Unifor),” ku iya.

    Uggah madahka Kepala Menteri Datuk Patinggi Abang Johari Tun Openg udah chukup manah ngagihka RM15,000,000 ngagai belanja Unifor ba taun tu aja.

    Direktor Datu Dr Ngenang Janggu Unifor (asal iya dikelala ngena nama Unit Jalai Pengarap Ukai Islam).

    “Lebuh dibantaika taun nyin tadi, bisi mayuh jaku kelulu madahka tu semina propaganda politik perintah enggau ritorik ex-Kepala Menteri (niang Datuk Patinggi Tan Sri Adenan Satem) aja. Taja pia, nengeri tu beratka unit tu lalu enggau unit tu, polisi inklusif di Sarawak udah dipeda sereta diasai. Tu unit nyendiaka servis ngagai jalai pengarap bukai kelimpah ari Islam di Sarawak,semina di nengeri tu aja ke bisi unit ke baka tu di menua tu,” ku iya seraya nambah, Abang Johari, sebaka enggau niang Adenan, ngarapka diri nyadi Kepala Menteri ungkup semua bansa enggau jalai pengarap.

    “Kebuah ke bukai Unifor tu ditumbuh ngambika bisi forum endur bejuraika sebarang pekara ti patut dikerandau entara gerempung pengarap ukai Islam sereta mega antara gerempung ukai Islam enggau Islam,” ku iya nambah.

    Uggah nyemetak madahka nengeri tu begunaka unit baka Unifor ba pengawa beratika isu dunya di sereta dunya ti nyadi pemar lalu pekara tu balat agi nyadi enggau peneras internet.

    “Kitai semua nemu dunya kemaya hari tu chukup mar lalu tu balat agi enggau peneras ba teknologi. Nya alai, deka mayuh isu ti ulih ngasuh kitai pambar lalu kitai mega ulih berampit sereta nyadi pun penyarut.”

    Iya besemaya ke alai Ngenang deka bejalai gawa ngagai menua, ngulihka timbal sereta dulu agi beratika sekeda isu lalu ari nya Unifor deka naka ulih mutarka iya.

    Ngenang pasal petalat ke nyadi ba hak tanah Adat Bansa Asal (NCR) – Pemakai Menua enggau Pulau Galau (PM,PG) ba tanah, ku Uggah, nadai isu ba tanah NCR ti ulih diputar nengah pengawa mandangka diri ringat sereta negah penerang media ti ditabur.

    Ku iya, komiti khas tanah NCR sedia nerima penatai ngambika berandau sereta nerang silik lalu semina sida ulih ngenukuka penerang enggau nadai besiping ba pengelantang raban bansa.

    “Kitai meseti nentuka pengelantang jalai pengarap deka meruan bisi baka ke bisi sehari tu tauka manah agi. Semua meseti bejalaika pengawa diri, raban politik, pengarap enggau bala ketuai komuniti.Kitai udah nyadi nengri chunto di Malaysia ari sukur pengelikun pupu ba nsa enggau penyerakup.Kitai mega bisi Kepala Menteri ti bediri sereta madahka kitai semua ulih ngena jaku Allah dalam sembiang kitai,” ku Uggah ke mega Menteri Betanam Betupi Moden, Tanah Adat enggau Pemansang Kandang Menua.

    “Kitai meseti gawa begulai nentuka Sarawak tu likun sereta ngangkatka agi pengelantang raban bansa enggau jalai pengarap,” ku iya nambah.

    Berebak enggau pengerami lemai nya, Uggah bisi ngemendarka agih belanja perintah RM1 juta dikena belanja begunan baru gerija beungkus RM5 juta, Gerija Anglika St Francis di Kota Samarahan.

    Berebak enggau nya, sekeda ari 13 chapel ari baru pegai gerija St Francis mega nerima agih belanja sida empu. Sida tu iya nya St Barnabas Sampun Asajaya (RM70,000), St Phillip Pelaie Muara Tuang (RM50,000), All Saints Semawang (RM80,000), St James Sungai Batu Maura Tuang RM100,000) enggau St Peter Merdang Lumut Muara Tuang (RM200,000).

    St Peter enggau chapel All Saints ke diatu apin nerima begunan baru.

    Kaban Kunsil Nengeri (ADUN) Stakan Datuk Seri Mohd Ali Mahmud udah bejalaika pengawa besai ba pengawa bejuraika agih belanja ungkup gerija enggau chapel, ku Uggah seraya nambah, penatai iya (Ali) ba pengerami mandangka tikas bebatak asur enggau nerima kaul endang tinggi di Sarawak.

    Lebuhka dikerandau kemari ngenukuka ungkus projek gerija, Paderi ke mangku pengawa, Rev Dennis Gimang madahka belanja begunan gerija agi kurang ari RM2 juta.

    Ku Dennis, ke mega nyadi chairman pengatur pengerami Hari Minggu nya madah, penyampau RM1 juta diberi Uggah rambau pengerami nya, perintah nengeri mega bisi deka meri geran penyampau RM2 juta agi, ti deka diberi berenggat.

    Dalam jaku pengelalu iya malam Hari Minggu, Dennis meri pengaga ati ngagai Uggah ti udah dipadu nyadi Sapit Kepala Menteri ungkup semua bansa ke alai iya mega dipebasa sembiang merekat ke opis menteri iya.

    Ku Dennis, kenyau Uggah udah diatur Tuhan Bekuasa nyadi Sapit Kepala Menteri, enda manah endar pengawa begempuru bebala mayuh maya gempuru likun tanah NCR apin lama ke udah, ti ngangauka semengat ngenusahka sapa bagi orang ti ngasuh sida ringat.

    Nitihka pematut, rayat patut besampika Uggah enggau tim iya ngambika sida ulih gawa sereta nembuka tuju pengawa sida enggau nadai sebarang pengachau ari ke bukai, ku Dennis.

    “Barang sapa ngelaban iya, nya ngelaban Tuhan ti ngatur penuduk iya diatu. Nyema iya enda ngereja pengawa ti patut dikereja iya, tu antara iya enggau Tuhan ti bekuasa, ti disembah iya. Uji anang kelalu mejal iya tang besampika iya,” ku iya.

    Dennis nyemetak madahka Uggah bisi ati gawaka gerija kenyau ari hari iya nembuka pelajar sekula sekondari lalu iya dipadu nyadi menteri ti ngemataka Unifor, ukai reti kebetulan aja laban iya pechayaka Tuhan udah meri kereja ungkup iya laban komiti tu ditumbuh pengudah iya mulaika diri ngagai Sarawak,gawa dalam kabinet nengeri.

    “Ba pekara tu, iya engka enda nyendiaka berekat semengat baka nya tang abis nadai iya tau nyadi barang tauka belanja ungkup gerija Kristian sereta gerempung pengarap ke bukai sereta ba pekara raban minoriti di nengeri tu,” ku iya.

    Dennis mega ngarapka begunan gerija baru ulih dikena maya Krismas 2019.

    Sama bisi ngulu pengerami makai lemai nya iya nya Ngenang, Sekretari Mendam Opis Menteri Betanam Betupi Moden, Tanah Adat enggau Pemansang Kandang Menua Datu Jaul Sameon, Paderi ti deka ninggalka Gerija St Francis Rev Harold Jin Ahit sereta paderi ti dilaluka penatai Rev Moses Jakir sereta mega Canon Michael Wood, Father James Ahit enggau pedagang tebilang Leonard Martin Uning, ke mega Mandal Presiden Balai Dagang enggau Industri Dayak.

    Moses dipilih nyilih penuduk Harold ba Gerija St Francis di Kota Samarahan laban udah tu deka dipadu nyadi paderi ti gawa ba gerija St Mark di Limbang. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads