Urung 1402 iku polis gawa nentuka pengelikun sekumbang program WIEF - Berita Iban Online

Header Ads

  • Baru Nyadi

    Urung 1402 iku polis gawa nentuka pengelikun sekumbang program WIEF

    NGEMERATKA PENGELIKUN: Entara perengka ke bisi disedia dikena meresa pengelikun raban pesereta ke ngulu forum WIEF 2017.
    KUCHING: Urung 1402 iku polis deka gawa nyaga Bandaraya Kuching dalam timpuh konferen entarabansa ‘World International Economic Forum’ (WIEF) dipejalaikan di Palan Konvensyen Borneo Kuching (BCCK) berengkah ari seharitu nyentuk Hari Empat tu (21-23 November 2017).

    Kepala Polis Sarawak Dato Amir Awal madah kena negapka agi pengelikun sepemanjai WIEF 21-23 Nov tu, Polis Diraja Malaysia (PDRM) ngena benung ngena dua buah bilun engkabang PDRM bejalaika pengawa sida iya meresa ari penerebai bilun nya ninting hari berengkah ari kemari.

    “Berengkah ari sehari tu (kemari), peresa sereta jaga digaga ulih polis mungkur BCCK, sereta hotel lima bintang alai pemesai-pemesai dunya diau.

    “Berengkah ari minggu siti nyin tadi, kami udah nganjung bot polis ari Unit Marin bejalaika pengawa sida iya meresa sereta nyaga sungai-sungai ke besemak enggau BCCK, lalu baka nya mega enggau Skuter Ai ari Unit Marin,” ku Awal.

    Iya madah munyi nya lebuh bejaku ba aum media lebuh nyamu raban pengarang berita bekait enggau pemansang pengelikun penyereta sereta pemesai ke enggau ngulu WIEF di sebengkah hotel ditu, kemari.

    Iya madahka mayuh ari penegap raban pengelikun tu mega dianjung ari Indu Opis PDRM di Semenanjung Malaysia ke nyengkaum raban UTK (Special Action Unit/Unit Tindakan Khas, FRU (Federal Reserved Unit), Unit Udara, PGA (Pasukan Gerakan Am) enggau Unit Marin ke bisi dalam 1,402 ke semua iya.

    Ba pekara bekait enggau pengelikun mega, Awal madah, di hotel entarabansa, alai penyereta enggau pemesai diau, mayuh udah dipasang enggau ‘Scanner/Detector’ngambika ulih meresa sapa-sapa ke keluar-masuk hotel nya.

    “Tiap-tiap endur VVIP diau di mengeri besai tu nyengkaum di BCCK udah dipasang enggau ‘Scanner/Detector’ kena meresa tubuh penyereta sereta barang ke dibai tama ke dalam hotel tauka ba endur konferen.

    “Tu siti ari stindit pengelikun entarabansa, kelebih agi bekait enggau aum besai tikas entarabansa, semua perengka guna tu sigi dikena, nyengkaum meresa temuai bukai (ke ukai penyereta tang diau ba hotel ke sama).

    “Taja pia, temuai bukai ke diau ba hotel penyereta entarabansa tu, ngarapka kita besabar dalam timpuh tu, laban pengelikun nyadi pemerat,” ku iya madah lalu nandu baru, semua raban pengelikun gawa enda ngira maya sida iya patut bejaga.

    Ngagai mensia mayuh ke diau di Bandaraya Kuching tu ku iya, ngarapka sida iya mega sama besabar dalam timpuh aum besai tu.

    “Jaku lalau aku ngagai mensia mayuh ke diau di Mengeri Besai Kuching, ngarapka kita besabar dalam timpuh ke kiruh endar tu, laban aum tu tikas entarabansa, lalu tentu jalai bisi sekut mimit, tang taja pia, kami (PDRM) enggau naka ulih meri pengelantang ngagai mensia mayuh,” ku iya.

    Sama bisi enggau ngulu aum media nya kemari, Ketuai Polis Pelilih Menua Kuching (KPD), ACP Abang Ahmad Abang Julai. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads