Header Ads

  • Berita Tebaru

    Abang Johari enda mantul ngapa nagih hak Sarawak

    SELAMAT DATAI: Abang Johari datai bejadika Aum Deligit Parti Pesaka Bumiputera Bersatu (PBB) Zon 1 Kuching seraya diambat lebih 2,000 iku deligit PBB Zon 1 Kuching, kemari.
    Iya deka terus berunding enggau perintah besai bekaul MA63 ukai ngena chara belaban penemu.

    KUCHING: Kepala Menteri, Datuk Patinggi Abang Johari Tun Openg netapka penemu deka terus ngena chara berunding manah enggau perintah besai bekaul Sempekat Malaysia 1963 (MA63), ukai ngena chara belaban penemu.

    Iya madahka diri tetap enda mantul pasal hak Sarawak baka ke udah disemaya dalam MA63 lalu deka terus berunding enggau Menteri Besai Datuk Seri Najib Tun Razak ke udah setuju berunding sereta meri pulai baru bekaul hak Sarawak.

    Ku iya, Sarawak bisi chara ke diri empu berandau sereta berunding enggau perintah besai nitihka undang-undang, lalu ukai berunding chara anak nembiak mit.

    “Bisi orang mai aku belaban penemu (pasal MA63), nama kebuah belaban penemu, baka nembiak mit. Aku deka madah ditu, aku enggai belaban penemu nya ukai ketegal aku lemi, nya (belaban penemu) pengawa beli.

    “Kitai Sarawak bisi rega diri, kitai bisi chara kitai empu berunding enggau orang. Kitai deka ngetanka kitai empu. Kitai berunding nengah undang-undang tauka nitihka perlembagaan.

    “Aku bekeras dalam pekara tu. Orang ke ulih nganti aku semina Parti Pesaka Bumiputera Bersatu (PBB). Aku ngelaban ngarika PBB ngarika Barisan Nasional (BN) Sarawak.

    “Aku enda peduli enti bisi deka nukar aku. Tang ari penemu aku ke diri empu, aku deka bekeras, aku enda takut taja pan lenyau penuduk ketegal Sarawak,” ku iya ti nyadi Chairman BN Sarawak.

    Abang Johari ti mega nyadi Presiden PBB lebuh ke bejaku lalu bejadika Aum Delegit Parti Pesaka Bumiputera Bersatu (PBB) Zon 1 Kuching, ke diatur ba Penview Convention Centre (PCC) ditu, kemari.

    Abang Johari ti nyebut pekara nya lebuh ke ngenang Speaker Dewan Rakyat Tan Sri Pandikar Amin Mulia ti mai iya belaban penemu bekaul enggau isu Sempekat Malaysia 1963 (MA63).

    “Tu iya ngachau masuk champur. Mai aku belaban penemu, aku enggai. Nama guna baka nya (belaban penemu)...paloi,” ku iya.

    Ngenang pekara nya baru iya madahka diri tetap deka terus nampung pengawa ke dipejalaika niang Ex-Kepala Menteri Ke-5, Pehin Sri Adenan Satem dalam pekara minta pulai baru hak Sarawak baka dalam MA63.

    Ku Abang Johari, maya niang Tok Nan agi idup niang endang bisi berunding enggau perintah besai bekaul enggau peminta pulai baru hak Sarawak lalu Datuk Seri Najib ti sama dalam BN ke nyadi ketuai besetuju deka berunding.

    “Dalam langkar BN kitai berunding, mayuh agi pekara ti patut diperundingka. Baka tu meh pengawa dipejalaika kitai dalam PBB, ulih berunding,” ku iya.

    Nandu baru Abang Johari madahka perintah nengeri nganjung raban undang-undang ke London ti diuluka Menteri Muda Undang-undang, Kaul Nengeri-Perintah Besai enggau Pematau Projek Sharifah Hasidah Sayeed Aman Ghazali lalu meda baru dokumen ukai semina Sempekat Malaysia tang mega hak Sarawak ke diurus perintah koloni kelia.

    Perintah koloni suba sebedau kitai merdeka, semua dokumen dibai ke London magang lalu nya ke dipeda baru tauka diserungkai raban undang-undang ke London, ku iya.

    “Lebuh kitai meda baru, mayuh pemutus perintah British ti memihak ngagai hak ke patut diberi ngagai orang Sarawak,” ku iya ti bejaku dimua urung lebih 2,000 iku delegit PBB Zon 1 Kuching.

    Sama bisi datai ba pengerami nya, Menteri Muda Lektrik Menua Pesisir ti mega Ketuai PBB Pampang Pantai Damai sereta chairman pengatur aum Dr Abdul Rahman Junaidi; Ketuai PBB Pampang Tanjung sereta Kaban Kunsil Nengeri (ADUN) Tanjung Datu Datu Datuk Amar Jamilah Anu; Ketuai PBB Pampang Demak Laut sereta ADUN Demak Laut Dr Hazlan Hipni; Ketuai PBB Pampang Tupong sereta ADUN Tupong Fazzrudin Abdul Rahman; Ketuai PBB Pampang Samariang & ADUN Samariang Sharifah Hasidah Sayeed Aman Ghazali sereta Menteri Kerja Raya ti mega Ketuai Komiti Nembiak PBB Dato Sri Fadillah Yusof enggau ke bukai. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: