Anyie Ngau agi dipilih parti ngenanka sitak Baram, ku Tiong - Berita Iban Online

Header Ads

  • Baru Nyadi

    Anyie Ngau agi dipilih parti ngenanka sitak Baram, ku Tiong

    Datuk Seri Tiong King Sing
    KUCHING: Semua jaku tuduh sentang kuing politik MP Baram Anyie Ngau patut diketu laban parti mengkang milih iya bediri ngenanka penuduk ba Pengawa Bepiih Besai Ke-14 (PRU14), ku Presiden Parti Progresif Demokratik (PDP) Datuk Seri Tiong King Sing.

    Tiong nyemetak madahka peranak Baram mengkang dekaka Anyie sekali agi bediri ketegal ti chukup mentas meri servis ngagai rayat lalu ulih bekerejasama enggau tiga iku ADUN ke dikuasa parlimen Baram.

    “Naka ke diatu sigi nadai orang bukai, chalun parti sigi pemangku ke diatu, Anyie Ngau. Aku ngarap semua badu betalatka pekara tu ketegal nya pekara dalam parti.

    ‘Orang luar patut bebasaka pemutus parti lalu anang masuk champur ba pekara tu,’ku Tiong madah ngagai The Borneo Post kemari.

    Berita selebubu didinga ke alai sekeda orang bisi ngelakuka diri ba penuduk nya udah ngasuh penyukung PDP enggau BN enda lantang ati.

    Ketegal Tiong udah mutuska Anyie nyadi chalun ke ulih menang ungkup Baram, mensia mayuh kelebih agi penyukung PDP diatu patut beratka pengawa nentuka pemujur dijapai lalu ngenanka penuduk nya ungkup BN ba PRU14,

    Tiong mega madahka PDP deka ngenanka MP Mas Gading ,Datuk Anthony Nogeh laban iya mega chalun ke ulih menang.

    Ba sentang penuduk parlimen Bintulu ke dikuasa iya empu, Tiong madah pemutus nentuka bagi chalun ke deka bediri dia dilempaika ba ketuai renggat tinggi BN enggau pengundi.

    “Ba sentang penuduk Bintulu, ukai kuasa aku ngaga pemutus. Tajapan aku presiden parti, aku enda ulih milih diri empu lalu ketegal nya pemutus dilempai ba rayat,’ku iya.

    Ngenang sentang Saratok, Tiong sekali agi enggau nyemetak madahka PDP udah bisi chalun kediri empu ungkup PRU14.

    Saratok diatu diarika Tan Sri Mawan Ikom ti udah ningkilka diri ari SPDP lalu diatu siku pengari ke nadai parti. Ba pengawa bepilih nengeri ke udah, Mawan disabung nyadi chalun terus BN di Pakan lalu menang ba penuduk nya.

    Sapit Presiden PDP Datuk Nelson Ballang Rining lebuh dikerandau setuju enggau pemutus Tiong, ke alai semua bagi chalun ba empat penuduk PDP deka diputuska ketuai dalam parti.

    “PDP sebuah parti dalam gempung BN. ketegal nya pemutus parti meseti dipebasa lalu orang luar patut anang masuk champur ,’ku iya.

    ADUN Marudi ke mega Kaban Kunsil Besai PDP, Datu Dr Pengguang Manggil netapka Anyie mengkang chalun ke ulih menang ba Baram.

    Nambahka nya ku Pengguang, siti sempekat udah dipesetuju enti ADUN Baram diarika bansa Iban, ADUN Telang Usan meseti ari komuniti Kayan, ADUN Mulu ari bansa Kelabit lalu MP Baram meseti ari komuniti Kenyah.

    “Berindik enggau nya kami tiga setuju Anyie ti ngarika bansa Kayan patut dinanka lalu sekali agi ngarika parti ba Baram napi PRU14,’ku iya ke mega Menteri Muda Opis Kunsil Kandang Menua.

    Iya mega ngelalau peranak Marudi ngambi majakka sukung ngagai BN ketegal mayuh atur pemansang udah ditusun ungkup kandang menua nya.

    Entara sekeda ku Penguang iya nya Jematan Marudi ke berega RM84 juta, projek pemansang pasar Marudi ke berega RM17.36 juta ti deka berengkah ba taun baru, projek waterfront ke berega RM23 juta, palan industri mini ke berega RM11 juta enggau RM3.5 juta dikena ngemanah Fort Hose.

    “Kelimpah ari nya, pengawa ngaga jalai Marudi dipejalai enggau lanchar diatu,’ku Pengguang nandu. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads