Asil kraf jari komuniti Penan ulih rembus ngagai makit ke besai - Berita Iban Online

Header Ads

  • Baru Nyadi

    Asil kraf jari komuniti Penan ulih rembus ngagai makit ke besai

    MANAH AMAT : Dua iku pesereta ke ngulu program nya benung beratika sekeda asil kraf jari ke bisi dipandang.
    KUCHING: Asil kraf jari komuniti Penan, Murum dikeandal ulih rembus ba makit besai agi pengudah digaga ngena chara baru enggau kontemporari ba gaya tempan iya.

    Mandal Presiden Eksekutif Servis Korporat Sarawak Energy Berhad (SEB) Aisah Eden madahka gaya tempan baru enggau kontemporari nya datai ari kerejasama antara komuniti penenun Penan di Murum, SEB enggau Universiti Malaysia Sarawak (UNIMAS) kenyau ari taun 2016.

    Kerejasama tu ku iya nyadi pengawa begulai dikena ngemayuhka pengelain enggau ngangkatka rega dagang besai asil kraf jari asal Penan ti udah bisi ba makit dikena nambahka awak ngulihka penatai pemisi ti tegap ngagai komuniti nya.

    “Sehari tu (kemari) ngelaika siti da agi pemujur ti besai reti ba pengawa kitai begulai enggau bala komuniti Murum ngemansangka asil kraf jari sida.

    “Kitai mantaika gaya tempa ke baru enggau kontemporari dikena ngemujurka agi program Kraf Jari Murum, ti endang udah bisi peminta enggau timbal ti manah taja agi ba gaya tempa asal,” ku iya.

    Iya mansutka jaku nya rambau Kraf Jari Penan Murum: Pengawa Ngelanchar Gaya Tempa Kontemporari di Atrium, Menara SEB kemari.

    Ku Aisah, tu nyadi sebagi ari tanggungpengawa rama korporat (CSR) iya, batang tuju SEB iya nya bekerejasama enggau komuniti di palan pengentap baru pendiau ba program ngulihka penatai pemisi tegap nentuka tikas idup sida ulih disungkak.

    Nitih ku iya, inisiatif SEB enggau komuniti Penan di Murum udah dipun sebedau sida dipindah ngagai pengentap baru pendiau di Tegulang dan Metalun dalam taun 2013 berindik ari pengawa ngaga Tekat Ai Hidro Elekterik Murum.

    “Kelimpah ari nya, SEB nyaup ngaga sekula enggau ngepunka program literasyen besai ti ngasuh urung 400 iku orang besai tuai Penan ulih macha enggau nulis.

    “Sarikat tu mega, bisi gawa nyaup Wang Turu Amanah Bakun ti nangkup peminta pelajar Penan di Belaga sereta komuniti di palan pengentap baru ke bukai,” ku iya nerang.

    Nyadika tambah ku iya, program pemansang raban nembiak mega bisi dipejalai nengah kerejasama enggau Gerempung Pemansang Orang Indu enggau Ruang Bilik Sarawak (PPWKS) sereta ngemesaika program ‘Literasi Termasuk Sosial’ ti dipejalai begulai enggau Serakup Disleksia Sarawak.

    Nitih ku iya, diatu bisi 70 iku artis chakah ngaul diri ngasilka kraf jari di palan pengentap baru pendiau Tegulang nyengkaum ngasilka kraf jari bepelasarka manik.

    “Kitai mega udah ngatur beberapa renggat bengkel di Long Wat enggau Long Malin dikena ngemesaika agi asil kraf jari ti dipejalai nengah pengawa begulai enggau Komiti Kraf Sarawak enggau Kaunsil Pemansang Kraf Jari Malaysia Pampang Sarawak kenyau ari taun 2014,” ku iya.

    Ba lansa ke sama, Direktor Institut Informatik Sosial dan Inovasi Teknologi UNIMAS, Profesor Dr Narayanan N. Kulathu Ramaiyer ba jaku dipansutka iya ngarapka kerejasama SEB enggau UNIMAS ngerembaika agi pengulih ba pemansang asil kraf jari Penan, Murum ulih diteruska.

    “Kerejasama tu enda patut diketu naka tu aja tang ditampung dikena nentuka rebak baru Penan dudi hari deka terus diperansang nengkebang penemu ke baru sereta kontemporari.

    “Terima kasih ngagai SEB laban nengah kerejasama tu pengidup dudi hari Penan deka seruran ulih diangkat manah agi kelebih agi ari sukut penatai ekonomi,” ku iya.

    Tambah mega ku iya, kerejasama enggau SEB nya nyadi sebagi ari CSR UNIMAS kelimpah ari pelajar, nyaga pengerai enggau rama.

    Sama bisi datai Penulung Menijar Besai CSR SEB Jiwari Abdullah, Menijar Kanan Pemeranak Puku Rama enggau Pemansang Komuniti SEB, Joanne Tan enggau Profesor Madya Dr June Ngo Siok Kheng ari Opis Teknologi Reka Bentuk Fakulti Seni Gunaan enggau Kreatif UNIMAS. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads