Bai barang tama pansut nengah pintu ke sah - Berita Iban Online

Header Ads

  • Baru Nyadi

    Bai barang tama pansut nengah pintu ke sah

    KEREJASAMA: Bustaman nerima bup Nerima Kes Ari Agensi Luar NBOS ke disuaka (kiba) Roslan.
    KUCHING: Peranak menua luar ke diau ba garis antarabansa baka Malaysia-Indonesia dilalau meli tauka mai barang tama pansut ari menua tu nengah pintu ke sah.

    Panglima Briged Ke-3 Infrantri Malaysia Brigedier Jeneral Muhammad Bustaman Mat Zin madah, laban peranak menua luar ke diau ba garis antarabansa tauka antara menua dikemendarka bebelika barang di menua tu.

    “Nyema bisi barang ke dideka dibai tama tauka pansut ari menua tu, kami (ATM) ngelalau sida (orang menua luar ke diau ba garis antarabansa) nengah pintu ke sah.

    “Laban baka ke dipadah ngagai aku, dalam aum sosio-ekonomi peranak menua luar ke diau ba garis antarabansa dikemendarka meli sekeda barang ti ditentuka sereta ngena rega ti ditentuka.

    “Nya alai enti mai barang nya tama tauka pansut nengah jalai ke enda sah, nya enda dikemendarka,” ku iya.

    Iya mansutka pekara nya dalam aum pengarang berita ‘Taklimat Perundangan dan akta-Akta Yang Dikuatkuasakan’ari Bagi Penerit Adat Opis Menteri Dagang Dalam Nengeri Koperasi enggau Pekara Bebeli Barang Ngagai Pemesai enggau Raban Soldadu Malaysia (KPDNKK) ke diatur ba Dewan Bukavu, Kem Penrissen ditu, kemari.

    Lebuh ke ngenang pasal tanggungpengawa Raban Soldadu Malaysia (ATM) ti nempa kerejasama enggau KPDNKK, iya madahka ATM nadai kuasa penuh bekaul enggau kes mai belalai barang dijaga perintah, barang churi enggau ke bukai.

    “Kami semina ngetanka barang ti dipelabaka dibai belalai. Nyema bisi barang ditan enda ngira sekalika perengka pengangkut curi, orang datai enda beradat tauka datai belalai, keterubah iya kami ngaga ripot ngagai polis. Udah nya pengawa kami tembu.

    “Tang enti bisi peminta ari polis ti minta kami nyerahka ngagai kastam tauka KPDNKK, kami deka nganjung,” ku Bustaman.

    Kelimpah ari nya, Direktor Penerit Adat, Bagi Penerit Adat KPDNKK Datuk Mohd Roslan Mahayudin lebuh ke ngenang pasal licha nya, iya madahka Sarawak siri ketiga pengudah diatur ba kem Desa Pahlawan, Kelantan kena 26 Julai 2017 enggau ba Kem sultan Abdul Halim Muadzam Shah, Jitra, Kedah kena 10 Oktober 2017.

    Licha nya diatur berindik ari kerejasama entara KPDNKK enggau ATM, ti dikearapka ulih meri penerang pasal skop enggau senario isu ke nyadi ke maya hari bekaul enggau ketirisan enggau mai barang belalai nengah garis antarabansa, hak reta intelek enggau isu pekara bebeli barang.

    “Inisiatif ti dipejalaika dikena ngepun iya nya ngatur sesi licha undang-undang enggau akta ti dipejalaika Bagi Penerit Adat KPDNKK ngagai pemesai enggau raban ATM.

    “Tuju sesi licha tu dikena meri penerang ngagai raban ATM pasal undang-undang enggau akta ti bekaul enggau pekara bebeli barang, bidang kuasa KPDNKK enggau garis lalau nyerah kes ari ejensi luar.

    “Kerejasama enggau komitmen ti udah dipejalaika ba renggat nengeri Sarawak lebih agi ari Tim Rejimen Ke-4 Kor Armor DiRaja (Trup Div) ari baruh Operational Control (OPCON) 3 Briged begulai enggau KPDNKK Sarawak iya nya nganjung raban gawa di Pos Serikin maya ujung minggu ti nyengkaum ATM enggau KPDNKK Sarawak,” ku Roslan. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads