Balai mensia mayuh ti beungkus RM300,000 deka digaga di Rantau Panjai - Berita Iban Online

Header Ads

  • Baru Nyadi

    Balai mensia mayuh ti beungkus RM300,000 deka digaga di Rantau Panjai

    Dato Sri Wong Soon Koh
    SIBU: Lapan buah rumah panjai di Rantau Panjai, Batang Igan ditu deka ngasaika pengelantang bekenaka sebuah balai mensia mayuh ke beungkus urung RM300,000 ti deka digaga ba taun 2018.

    Projek tu nyadi bepun ari penyiru Menteri Wang II ti mega Kaban Kunsil Nengeri (ADUN) Bawang Assan Dato Sri Wong Soon Koh ke deka meda rayat dia enda timpang pemansang.

    Sekretari Politik ngagai Wong, Andrew Shilling madah, balai mensia mayuh nya deka digaga ba tengah-tengah genturung pendiau Rantau Panjai.

    “Wong udah ngemendarka balai mensia mayuh tu digaga ungkup rayat ditu ba taun ti deka datai,” pia ku iya maya bejaku ba Program Begulai enggau Komuniti@Rantau Panjai ba Balai Mensia Mayuh Rumah Franky Bawok, malam hari Minggu tu tadi.

    Ba pengerami tu mega, Andrew ngarapka mensia mayuh di Rantau Panjai enda ati dua nyukung chalun Barisan Nasional (BN) maya pengawa bepilih besai (PRU) ke sekali tu.

    Tu ku iya laban maya PRU2013 suba, peratus undi ngagai chalun BN ba Sekula Primari Rantau Panjai iya nya 88 peratus.

    “Maya Pengawa Bepilih Nengeri (PRN) 2016, sukung ngagai chalun BN nurun tujuh peratus iya nya 81 peratus.

    “Ngarapka maya PRU tu ila, semua pengundi di Rantau Panjai ditu ulih saum ati nambahka peratus sukung ngagai chalun BN,” ku iya ti kala nyadi Skretari Politik Kepala Menteri.

    Andrew madah, semina pengari rayat BN aja ulih mai pemansang ngagai rayat, lebih agi di rumah panjai.

    Nya alai ku iya, rayat ba rumah panjai patut nyukung pengari rayat BN, tang ukai semina ngira lambang parti aja.

    “Anang kitai belaya enggau pangan diri ketegal politik, tang kitai meseti ransing deka meda mayuh agi pemansang ba menua diri empu,” ku iya madah baru.

    Program sehari nya dipenyadi Chairman Gerempung Servis Komuniti Parti Rakyat Bersatu (UPP) Sibu ti mega chalun ke deka disabung UPP ungkup Parlimen Sibu, Dato Andrew Wong.

    Sama bela datai iya nya Temenggung Stanley Geramong, Pemancha James Semilan, Penghulu Jeffery Sut, Penghulu Evelyn Holly Sebom enggau chalun UPP ungkup kerusi Parlimen Lanang Andrew Ting. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads