Bemukun meseti ditanka raban nembiak rebak baru - Berita Iban Online

Header Ads

  • Baru Nyadi

    Bemukun meseti ditanka raban nembiak rebak baru

    Abdul Yakub Arbi
    MUKAH: Pesaka main asal Bemukun tauka Begendang ba peranak Sarawak patut ditan lebih agi ba nembiak rebak baru.

    Kaban Kunsil Nengeri (ADUN) Balingian Abdul Yakub Arbi madah, arus dunya moden enda patut nyadika dalih ngelesapka pemanah main asal nya.

    “Begendang tauka bemukun enda patut lenyau ngapa, tu patut ditan lalu diajar ngagai sida ke biak,” ku iya rambau bejadika Bermukun Mukah malam Hari Empat bepalan ba Dataran Pehin Setia Raja Mukah.

    Ku iya, pesaka lama nya patut ditan lalu enda patut lenyau pua aja laban nya ngerugi pengaya ke bisi dikembuan rayat di nengeri tu.

    Nya alai, nembiak rebak baru diajar seni pengeraja asal nya nyadi sebengkah peneleba baru dalam pengidup sida.

    Bekaul enggau program nya, Abdul Yakub bisi madah nya nyadi pelasar dikena betemu entara rayat pupu bansa seraya ke berandau.

    “Nengah chara nya kitai deka ulih ngetanka pemanah kaul, bekelala sereta baka nya mih kitai idup lantang,” ku iya.

    Iya mega madahka pengaga ati bekaul enggau pemujur ngatur pengerami nya laban beratika penatai  temuai dalam menua enggau menua luar lalu ngrapka iya ulih ditampung ngagai taun bukai ti deka datai.

    Sebedau nya, Residen Mukah Awang Johari Awang Mustapha ke mega Chairman Pengatur karnival bisi nyebut bekaul enggau tuju ngatur pengerami nya endang dikena ngelakuka main asal sereta pengawa seni ngagai temuai ari menua luar enggai sida ke nembiak.

    Tu mega ku iya nyadi sebengkah ari chara ngangkatka menua Mukah nyadi sebengkah palan dagang temuai ke dipilih temuai laban bisi ngembuan penyelai dalam ngatur pengeraminya.

    Karnival bemukun tu tadi berengkah kena  14 November 2017 lalu deka abis 17 November 2017.

    Kelimpah bisi penyereta ari serata Sarawak, pengawa tu mega bisi nganggauka raban ke bekaul enggau seni begendang lalu bemukun ari menua Brunei Darussalam.

    Sama bisi datai ba pengerami bejadika pengawa tu iya nya Sapit  Residen Jack Aman Luat, Pemesai Pelilih Mukah Safri Saili enggau Ketuai Raban Bansa Mukah Temenggung Hendy Suhai. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads