Besaup nyendiaka eko-sistem ngemujur agenda perintah - Berita Iban Online

Header Ads

  • Baru Nyadi

    Besaup nyendiaka eko-sistem ngemujur agenda perintah

    Datuk Abang Abdul Karim Tun Abang Openg
    KUCHING: Perbadanan Produktiviti Malaysia (MPC) meransang komuniti dagang tauka sektor peribit enggau ejensi perintah sama ngambi bagi ba pengawa nyendiaka eko-sistem ti engkeman dikena ngemujurka agenda digital ekonomi ti dikedeka perintah.

    Kaban Kaunsil Direktor MPC, Datuk Abang Abdul Karim Tun Abang Openg madah, akademik mega patut sama ngambi bagi baka univerisiti di Sarawak deka bisi program ke ulih dipejalaika begulai dalam proses tu.

    “Diatu kitai ngenang pasal baka ni sektor peribit patut ngambi bagi dalam inisiatif tauka agenda ke dipejalaika perintah.

    “Kami MPC dekaka komuniti dagang kelebih agi ejensi perintah sama ngambi bagi nyendiaka eko-sistem ti diguna dikena nyapai juluk nya ngambika nyadi nyata.

    “Laban dalam dagang ukai semina kitai deka bisi pengereja pengawa sereta produk aja tang diatu kitai bejakuka pasal eko-sistem. Lalu eko-sistem tu begunaka saup ba pengawa bejalaika transformasyen, tu ke pemadu beguna,” ku iya.

    Abdul Karim mansutka pekara nya lebuh ke bejaku seraya bejadika ‘CEO TALK, Siri 5, 2017’ ke diatur ba OUM, Sarawak ditu, kemari.

    Berebak enggau, tu iya meransang komuniti dagang, sektor peribit sereta ke bukai ngambika seruran berunding ‘ari luar kotak’ dikena nentuka agenda nya mujur dipejalaika.

    “Aku ulih beratika ambis nadai Sarawak diatu ‘trend’ kerejasama entara kami MPC enggau perintah sereta sektor peribit majak manah,” ku iya seraya madahka sektor peribit tauka komuniti dagang tauka akademik sereta semua orang bisi tanggungpengawa besai dalam agenda produktiviti.

    Kelimpah ari nya, iya madahka MPC dalam taun baru merambu deka ngatur mayuh agi ngatur program ke Sarawak sereta semua nya begunaka sukung ari semua.

    “Taun 2018 dipelabaka deka mayuh program diatur lalu semua nya begunaka sukung ari perintah, komuniti dagang, pelajar tauka akademik enggau ke bukai.

    “Baka program ke diatur sehari tu, taun tu bisi tiga siri program tu diperambu diatur tang aku minta ditambah laban program ti baka tu jarang dipejalaika di Sarawak, nya alai taun tu bisi lima siri.

    “Laban nengah program tu (Business Excellence) tu sebengkah program ke ulih meri peluang kitai belajar sereta bekunsi penyulut,” ku iya ke lalu madahka mayuh program diatur dikena kitai nyingkang panjai agi dudi hari.

    Kelimpah ari nya dalam jaku pengelalu, Direktor Open Univeristy Malaysia (OUM) Kuching Learning Centre Abdullah Borda madah, OUM nya mega nyambut sereta ngambi bagi dalam inisiatif ti dipejalaika perintah bekaul enggau transformasyen tauka dunya digital.

    Iya madahka universiti nya nyingkang nuju ubah nundaka peminta guna dalam pelajar.

    “Kami udah berubah nuju dunya digital, dunya automasi, teknologi tinggi, ‘artificial intelligence’ enggau ke bukai.

    “Semua pekara ke ulih dipikir sehari tu sekalika udah dalam proses digital tauka benung dalam proses digital ngambika seruran relevan lalu ba pekara pelajar pekara tu mega enda ulih diseliahka,” ku Abdullah.

    Ba licha nya, MPC enggau OUM ngagauka Direktor Urusan Mega Fortris (Malaysia) Sdn Bhd, Adrian Ng bekunsi penyulut kompeni nya nengah licha ke diberi nama ‘Business Excellence: Conquer The world”.

    Sama bisi datai Direktor MPC Kandang Sarawak, Tengku Azmi Tengku Majid enggau pesereta. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads