Chalun PRU14 meseti manah rikod - Berita Iban Online

Header Ads

  • Baru Nyadi

    Chalun PRU14 meseti manah rikod

    PBB BISI CHALUN BARU: Taja pia, Abang Johari madah, rintai nama nya deka dipadah dudi.
    Rikod sida deka dulu diperesa nengah sekeda ejensi nyengkaum SPRM.

    KUCHING: Semua chalun ke deka bediri nyadi chalun ba Pengawa Bepilih Besai Parlimen (PRU) ke-14, nyengkaum PRN (udah tu ila) enda tau enda diperesa Opis Kaunsil Kandang Menua (PBT) ke mungkur Polis, Opis Imigresen, Opis Chukai (IRB), Insolvensi enggau SPRM.

    Kepala Menteri ti mega nyadi Chairman Barisan Nasional (BN) Sarawak, Datuk Patinggi Abang Johari Tun Openg madah beratika PRU ke-14 deka digaga enda lama agi, chalun ungkup PRU nya deka ditapis sekeda ejensi nyengkaum Opis Nagang Penyalah Makai Suap (SPRM).

    “Ejensi-ejensi tu sigi bisi rikod, baka kami ketuai parti nadai megai rikod sida iya.

    “Chalun ke deka bediri maya PRU ke-14 sereta PRN enda tau enda ngembuan rikod ke manah.

    “Kitai enggai ngambi chalun ke enda patut, nangi lebuh maya udah bepilih, baru kitai tetemuka chalun nya ukai rayat Malaysia (ambika chunto), nya kebuah chalun enda tau enda ditapis dulu,” ku Abang Johari.

    Iya madah munyi nya ba aum media pengudah bejadika Aum Deligit Komiti Nembiak Parti Pesaka Bumiputera (PBB) Pampang N8 Satok Sesi 2013-2017 (Aum Tiga Taun Sekali) berambaika jaku ‘PBB Satok Mendokong Sarawak Digital) diatur ba sebengkah hotel ditu, kemari.

    Abang Johari ti mega Presiden PBB, nyerumba menua luar baka Australia napi penanggul ke sebaka ba sentang enda napis chalun sida iya maya pengawa bepilih besai menua nya ngujungka siku Sapit Menteri Besai menua nya, badu mangku pengawa nya laban ditemu ukai rayat Australia.

    “Australia napi penanggul ke sebaka, Sapit Menteri Besai sida iya diasuh badu mangku pengawa nya, lalu nambah enggau nya, sekeda ke ngelaku diri deka nyadi chalun tauka udah dituduh pangku pengawa, nyau pengelama udah nya ditemu ukai rayat Australia.

    “Kitai di Malaysia enda ulih nyamin semua pekara nya ‘okay’ magang-magang,” ku iya.

    “Lalu baka nya mega enggau chalun Malaysia bukai tang ba kitai di Sarawak, semua chalun deka ditapis sebedau sida dichiri nyadi chalun,” ku iya.

    Nya alai, ku iya, chalun ari Sarawak deka ditapis memanah ngambika nadai napi sebarang penanggul.

    “Enggai ke kitai baka kes Pujut, betul ke enda betul, awakka kort mutuska pekara nya, tang ba kami, chalun deka ditapis.

    “Laban suba, pemerat bansa tu enda diperesa, ba kitai semua ‘okay’ lalu kitai pan enggai nyau tengah jalai ila, bisi Pengawa Bepilih Mit (PRK), rayat rugi, lalu nambah enggau nya bekait enggau integriti,” ku iya.

    Ba tanya, enti rintai chalun ari PBB udah disediaka tauka bedau, Abang Johari ti mega nyadi Kaban Kunsil Nengeri (ADUN) Satok nyaut pengarang berita, bedau ulih dipadah diatu, tang bisi maya ila deka dipadah.

    “Rintai chalun ari PBB udah tu ila meh madah, sigi bisi mua barum baka ngelama tu,” ku iya.

    Ba penuduk ADUN tauka Kaban Parlimen (MP) ke mangku kededua pengawa, sigi enda diperansang, ku iya.

    “Ari PBB empu, nadai siku ke mangku pengawa nyadi ADUN enggau MP, lalu kami pan meransang sereta minta komponen parti bukai ngaga pengawa ke sebaka.

    “Ngelakka orang bukai mangku pengawa nyadi MP tauka ADUN, laban enti bisi siti aja pangku pengawa, pengawa ke digaga ulih ADUN tauka MP nyentuk agi, chalun tauka penyandang nya pan ulih ngemanahka agi pengawa iya,” ku iya.

    Sama bisi enggau ngulu aum media nya kemari, ADUN Muara Tuang ti mega nyadi Kaban Pemesai PBB, Datuk Idris Buang enggau Sapit Ketuai PBB Pampang Satok, Ibrahim Baki. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads