Genap bansa patut sedia ngemujurka program TN50 - Berita Iban Online

Header Ads

  • Baru Nyadi

    Genap bansa patut sedia ngemujurka program TN50

    Basil Thomas
    SARATOK: Mensia mayuh patut terus nemu baka ni pelin pemansang ke benung dipejalaika perintah nengah Transformasyen Nasional 2050 (TN50) ba jeman deka nyadi sebuah menua maju sereta moden.

    Siku orang ti ngelaku diri ari Parti Demokratik Progresif (PDP), Parlimen P205 Saratok, Basil Thomas madah, genap serak pupu bansa ari renggat umur enda ngira dini alai sida patut se­dia enggau program tu.

    Ku iya, pemuntan berurun singkang kemaya hari tu deka ngujungka sida tinggal ari semua sukut.

    “Diatu udah datai maya iya kitai patut engkebut lalu mega renggat ngerebut semua peluang pemansang ke udah disedia perintah nyerumba TN50.

    “TN50 sebengkah polisi perintah dikena nempa Malaysia nyadi menua maju ungkup timpuh 2020 ngagai 2050, kelimpah nyadi menua pemadu atas ba dunya dalam ekonomi, pengelantang ray­at sereta mega inovasyen.

    “Nya alai, dikena ngamat­ka misyen enggau juluk tu, semua piak patut bejalaika tanggungpengawa diri siti piak aja,” ku iya madah ngagai media, kemari.

    Ba Parlimen Saratok, ku Basil, pelin enggau aktiviti Agro Hub ke benung dipe­jalaika perintah ba sitak tu endang sebengkah peluang ke chukup manah dipasuk peranak ditu.

    Ku iya, bidang bepelasar­ka pengawa betanam betupi deka ngerembai berindik ari peminta ngagai produk tu.

    “Rayat mayuh patut nemu ninting hari mensia ke nguan dunya majak betambah lalu peminta ngagai barang pe­makai mega majak mayuh.

    “Pekara tu patut dipeda nyadi siti peluang. Nyadi nengah platform ke udah dipejalaika perintah ba si­tak tu, chunto iya nengah aktiviti Agropolitan Bukit Sadok iya patut diperati nyadi sebengkah peluang ke chukup manah dipasuk sereta dikemansang.

    “Tukar lalu ubah konsep ke udah digaga ngelama tu ari ‘Konsep mimit-mimit’ tauka semina ungkup diri aja ngagai lebih besai,” ku Basil.

    Tambah mega, dikena nentuka pemujur program tu, pengawa ngena perengka teknologi moden beguna amat lalu patut dikemansang enggau lengkas.

    Be r ebak enggau nya mega, ku iya pelajar ungkup nembiak rebak baru patut dikemerat nyadi agenda ke beguna ngagai semua ele­men tu.

    “Anang ninggalka pekara tu laban kenyau ari suba nyentyk diatu penyulut ba pelajar sesebengkah menua nyadi kunchi ngagai pekara pemansang.

    “Tu berindik ari iring ketuai ke landik sereta bisi penau ngujungka nempa institusi pelajar ke lebih manah,” ku tandu Basili.

    Basil siku peranak menua tu ke bebendar ngelakuka diri ngambi dipilih nyadi chalun PDP Parlimen P205 Saratok ungkup pengawa bepilih besai ke deka datai. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads