GSR nyadi komponen dikena nyukung pekara bekaul enggau rampa menua - Berita Iban Online

Header Ads

  • Baru Nyadi

    GSR nyadi komponen dikena nyukung pekara bekaul enggau rampa menua

    KENANG KITAI: Ahmad (duduk tengah) ke disempulang Mohd Hidzir (duduk dua kiba) begambar enggau bala pesereta ke nyereta licha GSR kemari.
    KUCHING: Adat ke dikelala enggau nama Guided Self Regulation (GSR) nyadi komponen ke nyukung pekara bekait enggau rampa menua, ke ngipak Command and Control (C&C) ke udah dikena Opis Rampa Menua (JAS) ngelama tu.

    Kepala Direktor Opis Rampa Menua Dato’ Dr. Ahmad Kamarulnajuib Che Ibrahim madah adat GSR deka mansutka ungkup undang-undang rampa menua ke majak dikena sereta pemujur mutarka rampa menua keleih agi ba pemain industri nya empu.

    “Adat GSR, adat ke ngemeratka rampa menua ke digaga nengah atur ‘environmental mainstreaming’, ke alai pemerat rampa menua diambi kira ba tetiap renggat proses ngaga pemutus.

    “Sida industri m angku betanggungpengawa penuh ngaga batang arus nengah apak ke udah disediaka ulih JAS. GSR sebagi ari chara bejalaika atur kuasa kediri empu (bentuk penguatkuasaan kendiri) ke ulih meri asil pemujur mutarka rampa menua dalam timpuh ke lama,” ku iya.

    Ahmad madah munyi nya lebuh nutup Seminar ‘Pemahaman dan perlaksanaan Guided Self Regulation (GSR) Bagi Industri di Negeri Sarawak Tahun 2017’ di sebuah hotel ditu kemari.

    Seminar nya mega, mujur matak urung 385 penyereta ari industri, sida ke bejalaika projek, orang ke bisi pemerat sereta konsultan rampa menua di Sarawak.

    Betatika ungkup undang-undang rampa menua nyadi empas ke berat lalu patut dikemeratka, ngambika ulih beratika penanggul pengamah angin ba rampa menua sereta empas ba pengerai mensia mayuh ulih dikuasa  sereta diseliah ari renggat keterubah.

    Ahmad nandu baru madahka dalam konteks mutarka rampa menua nengah hiraki mutarka pengamah angin ba renggat keterubah, nyadi chara nguasa ke pemadu manah.

    “Tu pengawa sereta tanggungpengawa ke besai ba sida ke gawa dalam industri tu, ke bediri ari mua bekait enggau mutarka rampa menua, dalam pengawa nguasa, mutar sereta betatika chara nyaga rampa menua ke mujur sereta holistik,” ku iya.

    Iya nandu baru madah, sigi bisi sejarah tauka rikod sekeda penusah ke bisi nyadi bekait enggau bebadi sereta tasah bukai ke bepun ari kurang sensitiviti sereta pemerat ba chara ngemutarka rampa menua baka insiden ‘Love Canal’ di New York, Amerika Syarikat dalam urung taun 1942 ngagai 1975, enggau insiden Minamata di Kumamoto, Jepun (1954) ke meri empas ke jai endar sereta nyadi lalau ngagai rebak kemaya hari tu.

    “Enda kurang mega bisi chara mutarka rampa menua baka kes bebuaika kimia Potasium ari Pulau Pinang di Pulau Pangkor dalam taun 1995, ngemunaska teda tauka laluh toksik ari Taiwan di Johor (2004),” ku iya.

    GSR nyadi adat ke disambut nyadi atur sereta rega ke diguna di komuniti ke dikuasa (regulated communities) baka pampang industri, pemaju projek EIA sereta juruaudit sereta jururunding bekait enggau chara ngemutarka rampa menua, ku iya.

    “Enti diperatika, konsep GSR keterubah  diberi kelala JAS dalam Atur Kualiti Rampa Menua, Efluen Perindustrian 2009 ke udah.

    “Reti nya, pengawa ngaga GSR nyadi adat, ukai reti nganti chara ‘tuju sereta nguasa’ (command and control – C&C) ke digaga JAS ngelama tu. GSR enti nitih, nyukung C&C lalu nangkan nya, ngajar kitai baka ke  ngempu rampa menua (environmental ownership)nuju japai pemujur dalam mutarka rampa menua sereta nitihka atur undang-undang,” ku iya.

    Sama bisi enggau ngulu atur pengawa nya kemari, Direktor JAS Sarawak, Mohd Hidzir Bakar. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads