Identiti fesyen Sarawak majak diterima di menua luar - Berita Iban Online

Header Ads

  • Baru Nyadi

    Identiti fesyen Sarawak majak diterima di menua luar

    Parti Pesaka Bumiputera Bersatu (PBB)
    SIBU: Identiti fesyen Sarawak ti bechuraka ukir lama baka Pua Kumbu ngembuan mayuh pengelebih enti dijual ngagai menua tasik.

    Pungka, pemanah chura ari pua tu endang udah lama dikelala sereta dikerindu bansa bukai.

    Ketegal nya, Ketuai Raban Nembiak Parti Pesaka Bumiputera Bersatu (PBB) Pampang Bukit Assek Dato Mohamad Yusnar Matalie ngarapka mensia mayuh ditu nemu beambi ulih ari pengelebih nya nengah pengelandik sida begagaka fesyen.

    “Awak tu mega patut dikena sida ke baru tembu belajar ba Roses Academy di Sibu ditu berundingka baka ni bekenaka pelajar sida ba fesyen ngaga fesyen ari ukir lama baka Pua Kumbu lalu dibai ngagai menua bukai,” pia ku iya madah maya bejadi Roses Academy Convocation enggau Fesyen Show ke diatur ditu, lemai kilah ensana.

    Bela datai maya tu iya nya Prinsipal Roses Academy, Rose Chukan.

    Ba pengerami tu, 26 iku nembiak Roses Academy nerima Diploma enggau 16 iku nerima setipikit.

    Sida tu baru nembuka pelajar sida baka ba ‘Hair Dressing’, ‘Beauty Creation’, ‘Intensive Facial Treatment’, ‘Advance Makeup’ enggau ‘Fashion Designing’.

    Nambahka jaku iya, ku Mohamad Yusnar, pengelandik ke dikembuan mega patut dibai ngagai menua bukai lalu anang natam ba nengeri tu aja enti udah nembuka pelajar.

    “Awak ngemansangka diri endang mayuh diumbaka diatu dunya udah mansang ba teknologi.

    “Ari teknologi kita ulih ngerembaika dagang kita.

    “Pia mega ngagai sida ke udah tembu belajar ba Roses Academy, berengkah diatu kita tau berunding kini ke tunga tuju udah tu baikka deka ngaga dagang diri empu tauka pekara bukai,” ku iya madah baru.

    Berebak enggau tu, iya bela ngajar apai indai ngambika berengkah ngembing anak sida ngembuan penemu deka ngemansangka diri lalu ngembuan juluk ati ke besai bepun ari umur ke biak.

    “Diatu sida graduate mayuh nadai bulih pengawa laban raban pengaji lantang agi ati nerima sida ke bisi pengelandik.

    “Nya alai, tiap taun bepuluh ribu sida empai bulih pengawa enti dibida enggau sida ke bisi ngambi pelajar ba teknikal enggau pengelandik,” pia ku iya.

    Tang ku iya, semua nya bekena pengering ati enggau ulah ti ransing ke patut dibantai nyempulang taja semua nya endang udah bisi ba diri ngelama tu. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads