Header Ads

  • Berita Tebaru

    Indek pengawa jai di nengeri tu kusut 1.9 peratus

    ACP Abang Ahmad Abang Julai
    KUCHING: Indek pengawa jai di nengeri tu kusut 1.9 peratus pengudah tujuh raban orang jai (gang) ditangkap kenyau ari bulan Januari taun tu.

    Opis Polis Pelilih Kuching naka ka bulan November taun tu ngerikod 1,425 indek penyalah jai enti dibandingka enggau 1,454 ungkup timpuh ke sama ba taun ke udah.

    Nitihka penerang ari Ketuai Polis Pelilih Kuching ACP Abang Ahmad Abang Julai, kes ke balat kusut iya nya kes ngeruntun ke alai semina 82 kes bisi dirikod naka bulan November taun tu enti dibandingka enggau 128 kes ba taun 2016.

    “Aku temegahka kerejasama enggau pengeran raban polis ngurang indek penyalah jai tu,’ku Abang Ahmad rambau gempuru ninting bulan di Indu Opis Polis di Simpang Tiga ditu, kemari.

    Iya nambah raban orang jai ke udah ditangkap iya nya Geng Yem, Geng Kazar, Geng Viva, Geng Faqrull enggau Geng Dido ke bekaul enggau penyalah ngerumpak ke alai Geng Bacok enggau Geng Idris bekaul enggau penyalah enchuri mutosikal.

    Semua raban gang nya ku iya ditangkap ba mayuh bengkah palan lalu ngujungka pengawa salah sida.

    Tajapia, Abang Ahmad ngelalau polis seruran bejalaika pengawa manah ngambi ulih nentu Mengeri Kuching seruran likun.

    Pekara nya ku iya deka mantu industri dagang temuai di nengeri tu lalu seraris enggau pengeran perintah ti deka ngemansangka Sarawak.

    Ngenang kaul bukai, iya muji pengawa manah raban polis ti udah nentuka pengelanchar penemuai raban ketuai dunya sereta VVIP di Kuching dalam timpuh berapa bulan ke udah.

    Entara sekeda VVIP ti bisi nemuai ke Kuching iya nya Prince Charles (Prince of Wales) enggau bini iya Camilla (Duchess of Cornwall), Sultanah Brunei-Sultan Hassanal Bolkiah enggau presiden Indonesian Joko Widodo.

    “Kitai balat kiruh dalam kandang berapa bulan ke udah tang semua mujur diintu enggau manah,”ku Abang Ahmad.

    Iya mega ngelalau raban polis ngambika sedia meri bantu ba sebarang penusah ampuh bah sereta pengawa bepilih besai ti deka diatur sebarang maya ba taun ti deka datai. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: