Isu berebutka penuduk deka diputar - Berita Iban Online

Header Ads

  • Baru Nyadi

    Isu berebutka penuduk deka diputar

    Dr Johnichal Rayong Ngipa
    KUCHING: Raban Nembiak Parti Rayat Bersatu (UPP) muji penerang dipansutka Sapit Menteri Besai Datuk Seri Ahmad Zahid Hamidi ke alai chalun terus Barisan Nasional (BN) dipelaba deka diisi ba penuduk dikena mutarka penanggul berebutka penuduk entara mayuh bengkah parti BN maya pengawa bepilih parlimen ti deka datai.

    Ketuai Nembiak UPP, Dr Johnichal Rayong Ngipa ke mega Kaban Kunsil Nengeri (ADUN) Engkilili madahka penerang dipansutka Zahid ukai semina patut, tang mega engkeman sereta ba maya ke patut lebuh semua penyukung BN udah sedia napi pengawa bepilih.

    Ku iya, tu pekara ti suah nyadi ke alai Parti Sa’ati Rayat Sarawak (SUPP) enggau UPP deka bela ngambu sekeda penuduk tang sida deka nerima pemutus bala ketuai tetinggi BN ba pekara chalun ulih menang ngetanka penuduk nya ungkup gempung BN.

    Rayong nimbal siti berita dikeluar ba portal online, The Malay Mail, ke alai Zahid Hamidi udah dikearap mutarka isu enggau penyerekang ti nyadi bekaul enggau pengawa ngagihka penuduk BN maya Pengawa Bepilih Besai Ke-14 (PRU14).

    Zahid dipadah bisi nyebut ke alai iya dipaduka Menteri Besai ke mega Chairman BN, Datuk Seri Najib Razak, nguluka Tim Mutarka Penyerekang, ti ditumbuh dikena mutarka penanggul.

    “Nadai mayuh kandang menua baka ke sebedau tu diperebut lalu aku ngarapka semua deka diputar manah,” ku penerang nya madah.

    “Baka ngelama tu, lebuh chalun dibantai ungkup sesebengkah kandang menua nya ke alai orang bukai udah sedia deka nampung pengawa tang enda dipilih, maya nya penanggul deka nyadi.”

    Dikena mutarka penanggul tu ku Zahid, kandang menua ti dipelaba nadai penanggul diperebutka, chalun deka dibantaika tumu agi, lalu chara bebida deka dipejalai ba kandang endur ke dipelaba bisi penyarut.

    Ngenggaika berita ti madahka pengawa ngagihka penuduk enda nerima timbal ti manah ari semua parti komponen ku Zahid, Umno gawa baka entiti korporat laban semua parti komponen udah berandauka pekara nya.

    “Proses nya chukup demokratik lalu pengawa ngagihka penuduk udah dikerandau maya aum BN nengah penaluk kerejasama enggau pengangkun begulai.

    “Enti bisi sebarang ubah ba pengawa ngagih, nya deka bepelasarka pengamat topografik  politik enggau tinjau ba penuduk nya.”

    Ku Zahid, taja engka bisi ubah ba penuduk dalam gempung, nya enda besiping ba penyampau penuduk ti diagih ngagai tetiap parti komponen.

    Ku iya, randau silik agi deka diatur enggau sekeda bala kaban BN pasal penuduk, kelebih agi nyema pengawa garis entara baru sitak  dipejalai.

    “Deka bisi pengawa besilih tang penyampau agi bepanggai ba kuota penuduk.

    “Dikena nentuka menang bepilih nyadi pekara beguna endar ngagai semua komponen lalu ngambika nerima pengawa bepilih tu meseti dialus memanah.”

    Ku Zahid, bisi pematut meretika tuju parti ti deka nagang penyakal ari ngerampas penuduk BN.

    “Kami enda mantah tauka nadai berasai enda puas ati laban semua nya dipejalai enggau lanchar.

    “Kami meseti ingatka tuju diri deka bulih majoriti dua per tiga,” ku iya. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads