Jaku English ulih dipelajar nengah chara nguji macha sereta bejaku - Berita Iban Online

Header Ads

  • Baru Nyadi

    Jaku English ulih dipelajar nengah chara nguji macha sereta bejaku

    Belajar Jaku English
    KUCHING: Penanggul landik bejaku English ukai semina ditapi siku tauka dua iku nembiak nitihka bansa tang ba rebak kemaya hari tu, kelimpah bala nembiak ke dianjung belajar ba sekula entarabansa.

    Andrew Paul, siku injinir ba sebuah kompeni entarabansa di mengeri tu, ti mega orang ke mungkal ‘Palan Pelajar Iban’ ba laman rama ‘Facebook’ bekunsika penemu iya pasal pejalai lebuh belajarka Jaku English.

    “Aku suba semina bulih gred 8 dalam Jaku English ba peresa Sijil Pelajaran Malaysia (SPM). Ku jaku deka belajar ngagai menua tasik,tang ‘angus’ ngapa laban ngadangka Jaku English nya endang sigi enda alah di pelajarka.

    “Maya datai ba universiti, tusah ati ninga orang bejaku kiba-kanan, bala pengelicha Melayu pan bejaku ngena Jaku English enggau pangan diri,” ku Andrew.

    Taja pia, Andrew enggai ngalahka diri laban ba penemu iya tentu bisi chara belajarka Jaku English, ku dalam ati iya din.

    “Nguji macha novel, nyau ngasuh mata tinduk aja. Nyauka setaun macha siti novel, sigi nadai utai ke diulih. Nya alai ba penemu aku, macha novel ukai chara ke manah dikena orang ke baru belajar, laban jampat leju enti kelalu mayuh utai ke enda ditemu ba sesiti lambar.

    “Tang pelaba aku, orang ke udah manggai ba tikas jelan iya landik ba Jaku English, engka tau macha novel,” ku iya.

    Nyau pengelama udah nya, Andrew madahka siku ari bakih iya ke udah nyadi pengajar, meri langgur penemu ngambika iya nguji macha surat berita laban kenu ku orang, chara macha ari surat berita nya ulih mantu nembiak ke deka belajar nya landik ba Jaku English.

    “Jaku English ukai subjek ke ulih dikeingatka kitai tang dipelajar nengah chara nguji macha, bejaku dalam Jaku English.

    “Lebuh muka surat berita, berengkah ari kepala berita berita nya dulu, dikena nambahka leka jaku. Udah nya macha berita ke pandak sereta ke mudah ditemu isi berita nya,tandu chara nya macha surat berita ninting hari, tau nyaup ngubah pengelandik kitai ba Jaku English,” ku iya.

    Taja pia, iya mega madahka bisi tiga bengkah pekara ti meseti diperatika kitai maya ngelatih diri empu bejaku English, iya nya ari sukut struktur jalai jaku, nemu macha tang enda nemu bejaku (agi berunding dalam Jaku Iban, udah nya baru nyalin ngagai Jaku English, ke enda manah munyi tauka mata munyi), sereta nemu leka jaku teknikal (kelebih agi dlam bup teks bekaul enggau pekara injinir)tang enda nemu nyebut jaku nya ngagai orang.

    “Laban bisi bida entara leka jaku biasa dikena kita besesehari dibanding enggau leka jaku teknikal.

    “Udah nembuka pelajar, aku enggau orang intebiuka pengawa,peluang pengawa bisi lima iti tang orang ke nurun inteviu nya lebih 200 iku. Ketegal kelalu nangika sturuktur jalai jaku (enggai ke enda betul), nyau ngelanggak 2 butul bir dulu, tang nasit manah, bulih pengawa nya.

    “Diatu macha, bejaku sereta berandau nadai tentu penanggul tang enti lebuh nulis struktur jalai jaku bisi mar mimit, agi ngena munyi aja, tang enti sanggup belajar, baru ulih asai aku, enda patut enda ulih,” ku iya.

    Ari peneleba nya, ku Andrew (baka kes iya empu), pemerat ni bagi Jaku English ke patut dipelajar dulu, iya nya leka jaku meseti dulu ari struktur jalai jaku.

    “Nangkan nya, bagas agi macha dikena nambahka leka jaku, chukup beguna lebuh belajar English. Enti kitai udah manggai ba tikas semina enda nemu seleka tauka dua leka ba siti (ayat),tau dipadah udah landik endar kitai ba Jaku English.

    “Tang ke pemadu manah, chara ngelatih diri bejaku English, iya nya nengah chara bejaku...nadai lebih ari suah ngena jaku nya. Nya alai, ke pemadu iya manah, belabuh ari mit bejaku ngena Jaku English, baik nya di rumah tauka di sekula.

    “Kitai ke nyadi apai indai tau enda ibuh bejaku nemu bejaku enggau sida…asal semua utai ke dibacha, didinga, dipeda bala anak mayuh dalam Jaku English, baka surat berita, majalah, komik, radio, dvd, TV, wayang, bup, Bup Kudus, bisi tauka semua dalam Jaku English.

    Berindik ari Jaku English ke majak diasuh dikena di Sarawak, Menteri Pelajar, sains, enggau Pansik Teknologi, Dato Sri Michael ngelalau nembiak di Sarawak berengkah bejaku English.

    Iya madah, nembiak Sarawak patut diperansang bejaku English ngambika ulih ngangkatka pemanah Jaku English sida.

    “Anang irauka jalai jaku, kitai enda tau enda berengkah ngena jaku nya(English)dulu, enti enda nemu pan, pajakka aja,” ku Manyin madah ba  pengawa bejadi Simposium Pelajar Jaku English Sarawak (SELES) 2017 ke bela digulu Kepala Menteri bedau lama tu tadi.

    Iya mega madahka nembiak di menua tu meseti bisi pengulih bejaku Jaku Engish nya dulun sebedau sida ngemanahka agi standard Jaku English sida iya.

    “Jaku English nyadi jaku global dalam pengawa dagang, Sains enggau diplomasi di serata dunya,” ku iya. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads